Pekeng dentista gipriso

Pekeng dentista gipriso
CIDG-BAR

MINGHOY ang usa ka lalaki nga nagpailang dentista human madakpi atol sa entrapment operation sa Criminal Investigation and Detection Group-Bangsamoro Autonomous Region (CIDG-BAR) alas 7:00 sa gabii, Miyerkules, Mayo 8, 2024, sa Barangay Lilod-Saduc, Marawi City, Lanao del Sur.

Si CIDG-BAR Regional Director Lieutenant Colonel Ariel Huesca nag-ila sa suspek nga si alyas Jason, 25, nga taga Marawi City.

Gidakop si alyas Jason tungod sa "Illegal Practice of Dentistry" human wala makapakita og sertipikasyon, registration ug professional ID nga magpamatuod nga legal siya nga dentista.

Nakuha gikan sa suspek atol sa operasyon sa CIDG-BAR sulod sa gipuy-an niini ang nagkadaiyang dental paraphernalias.

Gibutyag ni Huesca, sukad Enero 2024, niabot na sa walo ka mga dentista ang ilang nadakpan.

Tulo niini gikan sa Cotabato City, duha sa Maguindanao Provinces samtang tulo sa Lanao del Sur.

Gipasalig ni Huesca nga ilang hingusgan ang ilang kampanya batok sa mga dili lisensiyadong medical practitioners aron maseguro ang kahimsog ug kaluwasan sa mga lungsoranon batok sa dili awtorisado nga mga mananambal.

Ang suspek anaa na sa prisohan sa CIDG-BAR sa Cotabato City ug pasakaan siya og kasong kalapasan sa Republic Act 9484 o The Philippine Dental Act of 2007. (Edgar E. Fuerzas)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph