Philhealth: ‘Single confinement policy’ tangtangon

GOOD news alang sa tanang miyembro sa Philippine Health Insurance Corporation (PhilHealth) gumikan kay tun-an karon sa ahensiya ang pagtangtang sa single confinement policy human kini nahisgutan sa Senate Committee on Health Public Hearing niadtong Agosto 20, 2024.

Atol sa pagdungog nga gipangulohan ni Senate Committee on Health Chairperson Senator Christopher “Bong” Go, si PhilHealth CEO ug president Emmanuel R. Ledesma, Jr., mihatag sa iyang pasalig nga tun-an pag-ayo sa maong ahensiya ang rebisyon ug ang posibleng pagtangtang sa nahisgutang polisiya, nga nagkanayon nga adunay depekto ang pagpatuman niini.

Ang senador sa iyang pamahayag, nagpataas sa polisiya sa single period of confinement, ug gikuwestiyon niini ang maong polisiya.

“Bakit ganyan ang polisiya? Kunyari nagka-kumplikasyon ka sa panganganak pag nagka-bleeding, makaka-claim ka base sa case rate. Pero sa susunod na linggo, pag mag-bleed ka ulit, hindi ka na makaka-claim,” sa pahayag ni Go.

Ang usa ka panahon sa pagka-confine, sumala sa PhilHealth Circular No. 0035, series of 2013, nagpasabot nga ang admissions ug re-admissions tungod sa samang sakit o pamaagi sulod sa 90-calendar day period mabayran lamang og usa ka case rate benefit.

Alang sa usa ka yanong lungsuranon nga taga Barangay 29-C, Poblacion Davao City nagbutyag nga kinahanglan tanggalon na kini sa PhilHealth nga polisiya gumikan usa kini ka subo nga palandungon alang sa usa ka kabus.

“Dili puwede nga kung ma-confine na ka, tapos imong nagamit, dili na nimo magamit after one month ug 2 months nga kung mabalik na pud ka sa ospital, alangan pugngan nimo ang diarrhea kintahay kana imong balatian,” sumala ni Jocelyn Villegas, 54-anyos, usa ka inahan sa upat ka anak.

Dako sab ang kalipay sa usa ka street sweeper sa City Environment and Natural Resources Office (Cenro) sa Davao City sa gihimo karong aksiyon sa PhilHealth.

“Kini ang nindot kay mora'g unlimited na nato magamit atong PhilHealth ba, dili baya gyud nato mahibal-an kanus-a ta magkasakit ug basin human niana mobalik ang sakit, mas maayong pundohan og dako sa gobyerno ang maong lakang,” ingon ni Geraldine Tiad, 57-anyos, taga Brgy. 76-A, Bucana Davao City.

Kabahin sa diskusyon niadtong Agosto 20 nga public hearing sa Senado mao ang sobra nga pundo sa PhilHealth, ang pagrepaso sa implementasyon sa Universal Health Coverage Act, ang paggamit sa mga medical assistance program, ang pagpatuman sa Health Facilities Enhancement Program, ug ang pagpagawas sa Health Emergency Allowances alang gihapon sa mga kuwalipikadong health workers, ug uban pa. (JPC)