Philippine Eagle naluwas

GENERAL SANTOS CITY -- Naluwas ang usa ka agila o Philippine Eagle (Pithecophaga jefferyi) sa probinsiya sa Sultan Kudarat, Miyerkules, Marso 19, 2025.

Gibutyag sa mga opisyal sa Philippine National Police-Maritime Group nga usa ka Deomel Baladjay ang nakakita sa agila sa Barangay Nuling, Lebak, Sultan Kudarat.

Gitunol ni Baladjay ang agila sa mga sakop Sultan Kudarat Maritime Police Station.

Gidala sab sa mga pulis ang Philippine Eagle sa City Environment and Natural Office (Cenro) Kalamansig alang sa tamang desposisyon ug masuta ang panglawas sa langgam.

Kung baskog na ang agila posibleng buhian kini sa kalasangan sa Sultan Kudarat Province.

Nagpahimangno ang Regional Maritime Unit-12 ( RMU-12) kalabot sa balaod nga Republic Act 9147 o ang Wildlife Resources Conservation and Protection Act ug kung adunay maluwas, o adunay nasayrang mga aktibidad nga nakasupak sa maong mga balaod idangop sa ilang buhatan aron nga matagaan og pagtagad. (Edgar E. Fuerzas)