Pipila ka lugar sa siyudad gibahaan

Pipila ka lugar sa siyudad gibahaan
(Tampo sa DCPO)

GIPAHINUMDOM sa mga kabanay sa mga nangamatay ang 13 ka tuig nang kasumaran sa Matina Pangi flash flood nga mikalas og 30 ka kinabuhi ug usa ka tawo ang nawala niadtong Hunyo 28, 2024.

Duha ka adlaw takdo sa kasumaran, nakurat ug nangalisang sab ang mga tawo daplin sa mga sapa ug creek sa Calinan, Toril, ug Talomo area sa Davao City gumikan sa pag-apaw sa tubig nga maoy natigum gikan sa taas nga bahin sa siyudad hatud sa sagunsong pag-ulan.

Gani, usa ka pre-emptive evacuation ang gimando sa Davao City Disaster Risk Reduction and Management Office (DCDRRMO) sa mga nagpuyo duol sa Bago Creek, sanglit anaa na sa critical level ang tubig sa upland nga bahin sa creek.

Sa river monitoring sa DCDRRMO niadtong Lunes, Hulyo 1, ang Talomo River sa Barangay Tugbok Proper na-monitor nga miabot sa code red kun critical level, ug steady condition ang tubig.

Ang Lipadas River sa Crossing Bayabas na-monitor nga anaa ang tubig sa code yellow diin hinay-hinay nga miubos.

Samtang ang river channels sa siyudad na-monitor nga anaa sa code green kun safe level.

Sa taho sa Davao City Police Office - Search and Rescue (DCPO-SAR) malampusong na-rescue ang usa ka residente nga naanod sa kusog nga bul-og sa tubig-baha sa Talomo River, Calinan, Davao City hapon sa Hunyo 30.

Sa report, ang lalaki nailhang si Wilfredo Onez Jambo, 48-anyos, nagpuyo sa Purok 6 Nable, Barangay Calinan kinsa na-rescue na sa Purok 1, Balite, Calinan ning siyudad.

Nasayran nga sa kakusog sa bul-og sa tubig-baha, naguba ang dike diin naanod ang lalaki.

Una niini, nakurat ang mga naligo nga residente sa Lubogan River sa Toril sa kalit nga pagbul-og sa kusog nga tubig sa sapa hapon sa Hunyo 30.

Dali sab nga nanagan padung sa taas nga bahin ang mga nangaligo, diin ngilngig ug hadlok kaayong tan-awon ang kakusog sa tubig nga miguba sa pipila ka mga cottage sa sapa.

Nagpahimangno ang DCDRRMO sa mga residente duol sa kasapaan nga mobakwit na dayon padung sa luwas nga dapit ugaling magpadayon ang taas nga oras sa pag-ulan gumikan posible ang pagtaas sa tubig sa kasapaan.

Ang nasinati nga pag-ulan sa Davao City gumikan sa weather system nga Easterlies. (JPC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph