PNP-IAS nagsusi sa duguong hitabo sa Tagum

NAGPAHIGAYON karon og inisyatibo (motu proprio) nga imbestigasyon ang Philippine National Police-Internal Affairs Service (PNP-IAS) kalabot sa maduguong hitabo nga nikalas og upat ka kinabuhi sa Tagum City niadtong Huwebes sa tungang gabii, Agosto 9, 2024.

Kini human nga aksidenteng napusilan sa usa ka sakop sa Davao del Norte Police Provincial Office (DNPPO) nga miresponde sa mangilngig nga insidente ang 20-anyos nga bystander nga giilang si R-Jay Cahilog kinsa tua sa crime scene aron unta motabang sa mga biktima.

Si Cahilog, kinsa gituohan sa kapulisan nga maoy suspek, naigo sa saag nga bala nga gipabuto ni Staff Sergeant Ritchel D Ybañez.

“Pina-iimbestigahan ko na,” kini ang gibutyag ni Police Regional Office-Davao Region (PRO-Davao) director Brigadier General Nicolas Torre III ngadto sa SunStar Davao pinaagi sa mensahe sa Viber sayo ning semanaha.

Sa laing bahin, sa radio report sa iFM News Davao niadtong Miyerkules, Agosto 14, ang media outlet nagkanayon nga ang National Bureau Investigation-Tagum District Office (NBI-Tagum) mohimo usab og parallel and timeline investigation nga girekomenda sa Tagum City Prosecutor's Office.

Si NBI-Southeastern Mindanao Office (NBI-Semro) Director Atty. Arcelito Albao nibutyag usab sa interbyu sa media nga ang mga patay’ng lawas sa mga indibiduwal ipaubos sa autopsy reports.

Base sa spot report nga gihatag sa kapulisan sa Davao del Norte, ang duha ka mga empleyado sa usa ka shopping mall sa dakbayan gidunggab-patay gamit ang kitchen knife sa ilang boarding house sa Talisay Zara, Magugpo East. Giila sila nga si Jessa May Tabag, 19, ug Joan Rondan, 28.

Sa laing bahin, ang suspek nga gihinganlan og Nelson Narbasa, 33-anyos nga security guard sa Criss Inn ug residente sa Montevista, Davao De Oro, na-neutralize sa mga pulis.

Narekober sa Davao Norte Provincial Forensic Unit (DNPFU) ang pito ka mga fired cartridge cases ug tulo ka fired bullets nga gituohang gikan sa 9mm caliber pistol nga gikuha sa ilang kustodiya alang sa dugang ballistic examination ug usa ka kitchen knife nga may sukod nga kapin kun kulang 37 pulgada.

Sa kasamtangan, nanawagan karon og hustisya ang kabanay sa mga biktima. (JPC/DEF)