Police station gipabutha’g granada

Police station gipabutha’g granada
Shariff Saydona Mustapha MPS

COTABATO CITY — Grupo sa Bangsamoro Islamic Freedom Fighters (BIFF) ang gitudlo sa mga awtoridad nga milabay og granada sa usa ka istasyon sa pulis alas 11 sa buntag, Lunes, Marso 18 sa probinsiya sa Maguindanao del Sur.

Gibutyag ni Police Regional Office-Bangsamoro Autonomous Region (PRO-BAR) nga duha ka wala mailhing tawo nga sakay sa motorsiklo ang miitsag granada sa Shariff Saydona Mustapha Municipal Police Station sa Barangay Nabundas Shariff Saydona Mustapha Maguindanao del Sur.

Abtik sab nga miikyas ang mga suspetsado sakay sa motorsiklo paingon sa hilit nga dapit sa Shariff Saydona Mustapha.

Miigo ug mibusikad ang eksplosibo sa septic tank sa kasilyas sa kapulisan.

Walay naangol nga mga pulis gawas lang sa mga igo kilid sa police station sa mga mituasik nga tipaka sa granada.

Nakamugna sab og kahadlok sa mga sibilyan nga namuyo duol sa police station ang pagbuto sa granada.

Sa kasamtangan gipahugtan pa sa kapulisan ang seguridad uban ang militar sa lungsod sa Shariff Saydona Mustapha.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph