GIKANAYON sa Public Safety and Security Office (PSSO) nga walay mahimong kausaban sa mga pamaagi sa paghatag og seguridad sa Davao, ilabi na sa taliabot nga Kadayawan Festival.
Gisulti ni Angel Sumagaysay, hepe sa PSSO, nga nakigkoordinar na sila uban ang safety and security cluster, apil na kang Davao City Councilor ug chairperson of the Peace and Public Safety Committee Luna Acosta, ug nagkompirma nga walay mahitabong kausaban.
“Kung unsa tong gina-practice nato as protocols wala ta'y bag-ohon, magpabilin na ang mga backpack ginabawal pero call sa security kung halimbawa sa tan-aw niya na kana nga bag puwede isulod sa tan-aw niya,” butyag niya atol sa paghinabi kaniya uban ang Davao City Disaster Radio (DCDR), Martes, Hulyo 29, 2025.
Kahinumdoman nga ang hisgutanan bahin sa pagbag-o sa polisiya nitumaw human nag-viral ang post sa social media gikan sa usa ka inahan nga si Hanna Cano, kinsa nagpaambit sa iyang kasinatian nga wala pasudla sa Rio Carnival sa Davao City Coastal Road samtang nagbitbit og backpack nga dunay mga gamit sa iyang anak.
Gipahimug-atan ni Sumagaysay nga panginahanglan sa pagmentinar og istriktong pamaagi sa pagbantay aron nga malikayan ang bisan unsang makatandog sa kahapsay ug kalinaw sa publiko.
Dugang pa niini nga ang ilang buhatan nakigkoordinar na uban ang mga manedyer sa hotels, motels, ug balay papahulayan sa Davao City nga motambong sa security forums isip kabahin sa safety operations alang sa panahon sa Kadayawan.
Matud niya nga natapos na nila ang security forum alang sa sektor sa transportasyon.
Gipahimug-atan sab ni Sumagaysay nga ang dakbayan wala makadawat og bisan unsang direktang mga hulga gikan sa bisan kinsa nga mga grupo ug ang Davao nagpabilin nga "insurgency-free."
Sayo niini, gipahibalo sa PSSO nga mga 14,000 safety and security personnel ipakatag alang sa 2025 Kadayawan Festival kon diin 600 ka personahe ang ipakatag matag adlaw.
Gipahimangnoan sa PSSO ang publiko nga ang "backpacks, hats, caps, jackets, and pointed umbrellas" istriktong gidili.
Giban sab ang non-transparent water bottles ug sakmiton kon masakpan. Gidasig sa buhatan ang moduyog sa Kadayawan nga magpraktis og “culture of security” ug itaho gilayon ang bisan unsang kadudahan nga mga indibiduwal ngadto sa mga awtoridad. (RGP)