NIABOT na og 5,389,422 ang populasyon sa Davao Region sukad Hulyo 1, 2024, base sa opisyal nga resulta sa 2024 Census of Population (Popcen).
Ang bag-ong datus, gipagawas sa Philippine Statistics Authority (PSA), nagpakita og modest population increase nga 145,886 gikan sa 2020 nga 5,243,536.
Padayon ang Davao City nga nanguna uban ang pinakataas nga ihap sa mga molupyo nga naa sa 1,848,947, nagpalig-on sa iyang estado isip "highly urbanized city" sa rehiyon.
Sa mga probinsiya, ang Davao del Norte natala sa pikadaghan nga populasyon nga 1.14 milyon, samtang ang Davao Occidental dunay pinakagamay nga naa sa 317,159.
Bisan pa sa pagtaas, ang tinuig nga population growth rate (PGR) sa rehiyon nihinay ngadto sa 0.66 porsiyento sa tunga-tunga sa 2020 ug 2024, ubos gikan sa 1.09 porsiyento nga natala tunga-tunga sa 2015 ug 2020.
Ang maong dagan nagsalamin kon diin ang nasud dunay pagsaka sa kinatibuk ang populasyon ngadto sa 112,729,484, nagpakita og 0.8 porsiyento nga growth rate, ubos sa 1.63 porsiyento nga nakita gikan 2015 hangtud 2020.
Nilusad ang PSA og duha ka dagkong matang sa census surveys: ang Census of Population and Housing (CPH), ginalusad matag 10 ka tuig, ug ang Mid-Decade Census of Population (Popcen), ginalusad sab matag lima ka tuig.
Ang 2024 Popcen mao ang ika-16th national census ug ang ikatulo nga gilusad sa PSA sukad nga namugna sila.
Ang census nagsilbi isip "vital tool" sa pagpahibawo sa polisiya sa publiko, pagplano, ug resource allocation sa national ug local levels.
Ang opisyal nga ihap sa populasyon nahimong "legally binding" kung ideklara sa Presidente, subay sa Batas Pambansa Blg. 72.
Ang Calabarzon (Region IV-A) nagpabilin nga maoy daghang tawo uban ang 16.93 milyon, gisundan sa National Capital Region (14.00 milyon) ug Central Luzon (12.99 milyon).
Ang hiniusang populasyon niining tulo ka mga rehiyon moabot sa 39 porsiyento sa kinatibuk-an sa nasud.
Namatikdan nga 16 sa 18 ka administrative regions nakitaan og pag-ubos sa population growth rates.
Ang Bangsamoro Autonomous Region in Muslim Mindanao (Barmm) niposte og pinakataas nga pagsaka sa 3.43 porsiyento, samtang ang Region V (Bicol) mao lang ang nag-inusarang rehiyon nga nakarehistro og negative growth sa -0.07 porsiyento.
Bisan pa sa "slowdown" sa population growth, ang ekonomiya sa Davao Region nagpadayon sa pagdako. Sumala sa PSA-Davao, ang rehiyon niposte og 6.3 percent growth rate sa 2024, mas gamay ngadto sa 6.7 percent nga natala sa 2023.
Ang iyang Gross Regional Domestic Product (GRDP) nisaka ngadto sa P1.08 trilyon, nagpataas sa Davao ngadto sa ikaupat nga pinakapaspas "growing regional economy" ug nagmentinar sa iyang posisyon isip "fifth-largest contributor" ngadto sa national GDP uban ang 4.9 percent share. (David Ezra Francisquete)