GILAUMAN nga gatusan ka mga kanasuran apil ang lokal ug langyaw'ng teritoryo magpasiugda og prayer rallies aron pagtimaan sa ika-80-anyos nga adlaw'ng natawhan ni kanhi Presidente Rodrigo Roa Duterte sa Marso 28, 2025.
Mga rali, nga mahitabo hangtud sa Marso 29, 2025 sa nagkadaiyang lokasyon sa Pilipinas ug sa langyaw'ng kabaybayonan, gipasiugdahan sa mga suporter ni Duterte aron pagpadayag og panaghiusa uban sa kanhi lider taliwala sa nagpadayong kaso nga gipasaka batok kaniya ngadto sa International Criminal Court (ICC).
Niabot si Duterte sa ICC sa The Hague, Netherlands, Marso 12, kon diin ang European-based criminal court nag-imbestiga kaniya bahin sa gialegar nga kampanya sa war on drugs, nga nahitabo gikan sa 2016 hangtud 2022, ug giakusahan nga nalambigit sa halapad nga extrajudicial killings (EJK).
Sa United States, ang rali mahitabo sa Fennin Street, Houston, Texas sa Marso 28, uban ang laing pag-ampo nga gitakda sa pagkasunod adlaw sa Times Square, New York.
Sa pikas bahin, mga suporter sa Michigan ug Kansas State maglusad sab og rali sa maong adlaw, magpakita sa halapad nga impluwensiya ni Duterte sa iyang mga suporter sa U.S.
Sa Canada, duha ka dagkong lokasyon ang magdumala sa prayer rallies. Ang una sa Toronto, Ontario, samtang ang laing usa mahitabo sa Saskatchewan. Dugang pa niini, usa ka special rally ang ilusad sa Vancouver, British Columbia, Marso 29, nga maatol sa adlaw nga natawhan ni Duterte.
Sa New Port Moresby, Papua, New Guinea, mga pro-Duterte nga suporter maghiusa sab sa global prayer rallies, magpakita sa suporta gikan sa mga Pilipino sa maong rehiyon.
Sa laing bahin, usa sab ka prayer rally mahitabo sa Abu Dhabi, United Arab Emirates, nagpakita sa panaghiusa sa mga suporter ni Duterte sa tibuok Middle eastern region.
Sa Europe, mga pro-Duterte nga suporter sa daghang mga nasud nagpasiugda sab og mga kalihukan. Usa ka mahinungdanon nga rali ang ilusad atubangan mismo sa ICC Building saThe Hague, Netherlands, magdani og pagtagad sa nagpadayong pakigbisog nga legal ni Duterte bahin sa iyang war on drugs. Kini nga kalihukan gilauman nga makadani sa internasyonal nga pagtagad nga mahatag sa kaso batok Duterte nga kasamtangang gipailawom sa imbestigasyon sa ICC.
Balil sa Pilipinas, daghang mga siyudad ug probinsiya nangandam sab sa paglusad og prayer rallies. Kini himuon sa Kibawe, Bukidnon; Alabel, Sarangani; Sablayan, Occidental Mindoro; Paco Arena, Manila; San Pedro, Laguna; ug Baguio City.
Dugang pa, mga rali sab mahitabo sa Ipil, Zamboanga Sibugay; Valencia City, Bukidnon; Malaybalay City, Bukidnon; Lucena, Quezon; Zamboanga City; Freedom Park, Davao City; ug Lipa City, Batangas.
Sa pikas bahin, mga siyudad sama sa Melvin Jones, Baguio City; Surallah, South Cotabato; Digos City, Davao del Sur; Dipolog City, Zamboanga del Norte; ug Mati City, Davao Oriental nangandam sab alang sa rali sa Marso 29. Dugang pa, duna say mga tigum alang sa pag-ampo nga himuon sa Bansalan, Davao del Sur; Isulan, Sultan Kudarat; Tagum City, Davao del Norte; Kidapawan City, North Cotabato; Bislig City, Surigao del Sur; Sawata, San Isidro, Davao del Norte; ug Peñaplata, Island Garden City of Samal.
Sa Davao City, mga rali magpadayon nga maoy "focal point of Duterte’s support base", ug uban sa pagsalmot sa lain pang pro-Duterte gikan sa nagkadaiyang mga ahensiya ug organisasyon.
Sukad Marso 25, si Abogado Israelito Torreon nagkanayon nga daghang mga lugar nagkompirma nga modumala og mga kalihukan base sa tubag sa mga komunidad, bisan tuod kung dunay uban nga wala pa makadawat og kompleto nga detalye bahin sa mga lugar, petsa, ug panahon. Gilauman nga mga rali makadani og mahinungdanon nga pagtagad sulod sa Pilipinas ug sa langyaw'ng kanasuran, nga magpakusog pa sa padayong impluwensiya sa mga suporter sa kanhi presidente. (David Ezra Francisquete)