MGA presyo sa palaliton sa Agdao Market, Davao City, ilabi na gyud karne sa baboy ug itlog padayon nga pagsaka-kanaug, agad sa suplay ug ekonomikanhong kondisyon.
Sumala sa mga negosyante sa Agdao, ang presyo sa karneng baboy nisaka tungod sa limitado nga suplay gikan sa tinubdan ug slaughterhouses.
Si Diane, tindera og karne sulod na sa pito ka tuig, nagkanayon nga duna na karon kalahian ang presyo sa karne itandi sa niaging mga tuig.
"Sa wala pa ang pandemic, ang karneng baboy naa lang P180 matag kilo, apan karon niabot na kini og P340-P380. Ang tiyan sa baboy naa na sa P400 matag kilo, samtang ang perna ug pork chop naa sa P350 matag kilo," matud ni Diane. Niadtong Disyembre, presyo naa pa sa P320, apan karong tuiga nisaka na kini ngadto sa P350.
Sugod Miyerkules sa badlis, ang panginahanglan sa karneng baboy niubos, ilabi na nga nagsingabot ang Semana Santa.
Ang presyo niini posibleng mosaka kay kasagaran sa mga tawo mohunong og palit og karne tungod sa kwaresma.
Samtang ang presyo sa pork belly sa Bankerohan Public Market nagpabiling lig-on sugod sa P350 matag kilo sukad Lunes, Abril 7, 2025, gisundan sa serye sa gagmay nga lihok sa presyo ning semanahana.
Subay sa pinakaulahing monitoring sa Department of Agriculture-Davao Region (DA-Davao), kini nagtimailhan og pag-ubos og P20 matag kilo itandi sa presyo sa niaging semana, nga naa sa P370.
Duna sab kini P10 nga pagkubos gikan sa P380 matag kilo nga natala niadtong Marso 24, 2024.
Sa pakighinabi sa dugay nang naninda kinsa wala magpaila, iyang gi-esplikar nga duna silay pagtaas sa presyo aron nga mokita og dyutay apan pabilin silang nisunod sa standard local price sa DA.
"Kasagaran naa sa P340 ang baligya, apan karon naa sa P350. Gamay lang taas,” matud niya.
Samtang laing namaligya, nihanyag sa presyo sa pork belly nga mas taas og dyutay sa P380 matag kilo, tumong niini aron nga makarekober sa alkanse ug mokita lang og dyutay.
Apan ang gikabalaka sa mga manindahay mao ang hinay nga palit. "Hinay ang palit ilabi na sa matag Lunes ug Martes," butyag sa dugay nang namaligya og karne. "Bisan gani og di molihok ang presyo, mga tawo di gyud mopalit og daghan sa sugod sa semana. Mga Biyernes ug Dominggo mao ang mga adlaw nga halin kaayo."
Samtang ang presyo sa karnet nagpadayon sa pagsaka, presyo sab sa mga itlog nitaas sab og P7-P10 agad sa gidak-on. Ang suplay sa mga itlog gikan sa Davao Farm Corporation.
Ang pagtaas sa presyo sa itlog bag-ohay lang tungod sa pagtaas sab sa panginahagnlan, ilabi na sa pagsugod sa klase.
Niabot ang presyo sa P7 hangtud P10 matag usa, samtang ang trey sa itlog nibalor og P255 hangtud P285.
Taliwala sa pag-usab sa presyo, mga negusyante sa Agdao Public Market padayon sa ilang pagpamaligya samtang mga konsumante nangita og mas barato nga opsiyon alang sa ilang matag adlay nga panginahanglan. (Aliah Trica C. Marciano, Charish Jane B. Gellor, HCDC Interns ug Cine Grace Languay, DOrSU Intern)