Principal, maestra gipusil; 1 samdan

BLANGKO pa ang mga awtoridad sa motibo sa pagpamusil sa principal ug kaubang magtutudlo alas 7:15 sa buntag, Martes, Agosto 20, 2024, sa Special Geographic Area sa Bangsamoro Autonomous Region in Muslim Mindanao (SGA-BARMM).

Sa maong insidente, usa kanila ang samaran nga giilang si Aurora Bayog Lida, 51-anyos, officer-in-charge principal sa Kapinpilan High School nga taga Barangay Poblacion 1, Midsayap, Cotabato Province samtang ang kauban niini nga magtutudlo nga si Maria Corazon Paradillo Tagacay, 38-anyos, Teacher 1, molupyo sa Barangay Kiwanan, Midsayap, Cotabato Province ang giingong wala maigo sa pagpamusil.

Gibutyag ni Midsayap Chief of Police Lieutenant Colonel Realan Mamon, nga sakay ang mga biktima sa motorsiklo nga gimaneho ni Tagacay ug paingon na niadtong higayona sa tunghaan.

Apan pag-abot nila sa Barangay Kapinpilan, Kadayangan, SGA BARMM, kalit lang mipatim-aw ang duha ka wala mailhing mga suspek ug dayong pamusil kanila ug dali gilayong nanibat lulan sa lang motorsiklo paingon sa hilit nga dapit sa SGA-BARMM.

Naigo si Lida sa tiyan hinungdan nga gihatud ngadto sa balay tambalanan.

Gisubay pa sa kapulisan sa Midsayap Municipal Police Station, pakig-alayon sa Philippine National Police sa Bangsamoro Autonomous Region (PNP-BAR) ang maong insidente. (EEF)