PABILING mabinantayon ang Police Regional Office (PRO)-Davao Region ug wa mokompiyansa bisan sa "green" classification sa Davao Region, o way giila nga mga areas of concern, alang sa taliabot nga 2025 midterm elections.
“Dili pasabot nga green ta, walay areas of concern, nibaba pud ang atoang level sa pagbantay nga mamahimong free, honest ug successful ang pagahimuong national and local elections,” matud ni PRO-Davao Region spokesperson Police Major Catherine Dela Rey atol sa Kapehan sa Dabaw, Lunes, Enero 20.
Iyang gitin-aw nga, “Wala ta nagakompiyansa ana, naga-monitor gihapon ta sa mga nidagan nga mga kandidato, naga-coordinate gihapon ta sa ilaha kung naa ba threats sa ilahang kinabuhi.”
Apan gikanayon ni Dela Rey nga wala nila gibalewala ang posibilidad nga dunay mga lugar sa rehiyon nga mahimong ma-reclassify ngadto sa mas taas nga kategoriya ug gipasalig nga andam sila nga motubag niini.
“If ever naay mag-arise, January pa man ta karon padulong pa pud ta sa May, naka-andam man pud ta na motugon kung naa man gali,” pasalig niya.
Dugang pa niya nga kini nga tubag mao ang pagpakatag og dugang mga pulis sa mga lugar, ilabi na atol sa adlaw sa eleksiyon, aron nga ipatuman ang seguridad.
“Kon naa man gali area of concern, magdungag ta para didto, na man pud tay reserve,” pagtataw pa niya.
Apan iyang giesplikar nga ang Commision on Elections (Comelec) lang ang makadeterminar kung duna ba'y lugar nga ideklara isip areas of concern, ilabi na nga ang nag-unang basehan mao ang election-related violence, kon diin, way election-related violence ang natala sa rehiyon.
Samtang bisan way kausaban sa kahimtang sa eleksiyon sa rehiyon, gisulti ni Dela Rey nga kasamtangan silang nagtutok sa paghatag og seguridad sa kampanya sa eleksiyon ug uban pang aktibidad nga dunay kalambigitan niini.
Dugang pa niya nga ang pagpakgang sa init nga panagkontra sa politika atol sa campaign period, ilabi na sa mga suporter, nagtakda sila og paglusad og sunod-sunod nga aktibidad uban ang Comelec ug mga kandidato mismo alang sa malinawong pangampanya.
“Kani para dili pud ingon nga moabot sa init kaayo ang ilahang pagahimoon nga campaign, ilabi na sa mga supporters kay mao na dayon na mag-init ang ulo, mag-away ayaw dayon,” esplikar niya.
Sa kasamtangan, uban ang pagpalihok sa Regional Election Monitoring Action Center (Remac), gisulti ni Dela Rey nga kasamtangan sab silang nagpalig-on sa ilang monitoring ug pagpatuman sa mga sumbanan sa eleksiyon, sama sa gun ban.
Pananglitan, sukad Enero 20, gitaho ni Dela Rey nga dunay upat ka kalapasan sa gun ban sa tibuok rehiyon sukad sa pagpatuman niini. Ang duha nadakpan atol sa operasyon sa pulis, samtang ang laing duha atol sa gilusad nga buy-bust operations.
Sa pagsugod sa election period, gitin-aw ni Dela Rey nga ang ilang mga pulis andam na nga ipadala.
Sa adlaw sa eleksiyon, gibutyag ni Dela Rey nga mga 6,000 ka pulis ipakatag ngadto sa mga voting centers, mga buhatan sa Comelec, ug uban pa. (PIA XI)