NAKATALA ang Davao Region og pagtaas sa produksiyon sa humay ug mais sa unang kuwarter sa 2025, nga nipadayon sa iyang pagsikad pataas gikan 2024, sumala sa Philippine Statistics Authority (PSA).
Base sa pinakaulahing Palay and Corn Production Survey, napublikar niadtong Hunyo 18, ang output sa humay sa rehiyon niabot og 146.85 libo metriko tonelada, dunay pagtaas nga 14.2 libo metriko tonelada o 10.7 porsiyento itandi sa samang kuwarter sa niaging tuig. Ang produksiyon sa mais nitubo sab ngadto sa 73.51 libo metriko tonelada, taas og 11.1 libo metriko tonelada o 7.3 porsiyento tuig-matag-tuig.
Nanguna sa gidaghanon mao ang Davao del Sur, nga nakatampo sa pinakataas nga pag-ambit sa duha ka matang sa bugas, nga naa sa 44 porsiyento sa produksiyon sa humay ug 35.6 porsiyento sa mais. Ang Davao del Norte maoy nisunod uban ang 24.7 porsiyento nga humay ug 15.5 porsiyento sa mais. Ang Davao de Oro nakatampo sab og dako, pinaagi sa paghatud og 19.9 porsiyento nga humay ug 15.07 porsiyento nga mais. Ang Davao Oriental nisuplay og 11 porsiyento nga humay ug 15.13 porsiyento sa mais, samtang ang Davao Occidental dunay ambit nga 0.4 porsiyento sa humay samtang 18.8 porsiyento sa mais.
Ang pagsaka nga dagan nagpakita og malutayong momentum gikan sa 2024. Sa ikaupat nga kuwarter sa niaging tuig, ang Davao Occidental dunay 9.9 porsiyento nga pagtaas sa mais, niabot og 15,911 metriko tonelada gikan 14,475 metriko tonelada sa samang panahon niadtong 2023. Ang pagtubo dala sa 8.3 porsiyento nga pagpalapad sa giani nga lugar, gikan sa 8,961 hangtud 9,701 ektarya, ug gamay nga pagtaas sa ani matag ektarya gikan sa 1.62 hangtud 1.64 metriko tonelada. Samtang ang mais nagpabilin nga dominante nga variety sa probinsiya, naghimo kasagaran sa produksiyon sa 15,176 metriko tonelada, samtang ang yellow corn niabot og 735 metriko tonelada. Bisan tuod kon ang ani sa yellow corn niubos og dyutay gikan 3.45 hangtud 3.39 metriko tonelada matag ektarya, apan ang kinatibuk-an niining bulto nisaka gihapon ngadto sa kapin 13 porsiyento.
Gitaho sab sa PSA-Davao ang padayon nga pag-uswag sa tibuok uban pang probinsiya niadtong 2024. Bisan tuod kon ang national corn production niubos og dyutay sa 1.5 porsiyento sa uwahing bahin sa 2024 tungod sa wa mipabor nga panahon, ang produksiyon sa humay nitaas og 2.8 porsyento, nagpakita sa lig-ong kontribusyon sa Davao Region ngadto sa national food supply ug ang iyang resilience sa mga hagit.
Tungod niining padayong progreso sa produksiyon volume ug land productivity, ang Davao Region gilauman nga magmentinar sa stable agricultural output sa mosunod nga mga bulan.
Ang datus nga nakuha gikan sa PSA sa quarterly palay ug corn production survey, nga nisubay sa trends ug pagbana-bana sa crop production sa tibuok nasud. (David Ezra Francisquete)