SA BAG-ONG katikaran nga naglambigit sa kaso ni kanhi Presidente Rodrigo Duterte uban ang International Criminal Court, nakakuha og mga sentimento gikan sa mga Pilipino ug bisan sa dili mga Pinoy, kon diin uban kanila nagpakita og suporta samtang ang uban nagpadayag sa ilang pagsupak.
Uban niining mga sentimento, pipila ka mga tawo naggamit og nagkadaiyang platforms nga nagpakatag og sayop nga impormasyon ug malisyusong datus.
Niadtong Marso 14, nikatap ang "unverified report" sa social media nga mga balay sa kanhi presidente ug iyang kabanay rondahon sa mga awtoridad.
Human sa espekulasyon, daghang mga suporter nibaha sa balay ni Duterte sa Davao City; uban kanila nagtukaw aron nga maseguro nga way mahitabo.
Bisan tuod kung mga awtoridad wala makatala og bisan unsang di maayong hitabo nianang adlawa, gitambagan ni Major Catherine dela Rey, tigpamaba sa Police Regional Office XI, ang publiko nga ihunong ang pag-post ug pagpakatag sa wala masusing impormasyon sa social media aron nga malikayan ang "escalation" sa kalihukan, nga dala sa taas nga emosyon.
“Do not post, believe immediately and share posts on social media because sometimes those are fake news,” ingon ni dela Rey.
Gidasig sa tigpamaba ang publiko nga i-"fact-check" ang mga taho gikan sa hingtungdang ahensiya una i-post o ipaambit ang impormasyon.
Tungod kay nalambigit ang law enforcement agency sa maong kontrobersiya, nihangyo ang tigpamaba sa publiko nga padayong mosuporta sa Philippine National Police kay "committed" sila sa pagmentinar sa kalinaw ug kahusay.
“Hopefully, their support for the police remains, because we are always committed to providing service to them as law enforcers, maintaining peace and order, and we are here to serve and protect,” pasalig niya. (PR)