GIAWHAG sa Philippine National Police (PNP) ang publiko nga magpabilin nga kalmado ug likayan ang pagpakatag og sayop nga impormasyon human sa pagkaaresto kang kanhi Presidente Rodrigo Duterte.
Sa pahayag, subling gibarogan sa PNP ang ilang "commitment" ang pag-abag sa tinarong nga proseso samtang magmentinar sa kalinaw ug kahusay sa tibuok nasud ug tumanon ang ilang papel sa pagdepender sa ilang tahas nga ipatuman ang balaod uban ang propesyonalismo ug pagsunod sa due process.
“The PNP strongly cautions against the spread of fake news and advises the public to rely only on official government sources for accurate information,” awhag niini.
Niadtong Lunes, Marso 10, 2025, si PNP spokesperson Brigadier General Jean Fajardo nagsulti nga ang PNP wala pay arrest warrant batok kang Duterte, bisan sa lokal o internasyonal nga korte.
Matud niya nga ang PNP wala pa sab koordinasyon uban sa International Criminal Police Organization Manila (Interpol) alang sa posibleng pagdakop kang Duterte. Apan kagahapon, Martes sa buntag, Marso 11, 2025, nagdumala sila PNP Chief General Rommel Marbil ug Criminal Investigation and Detection Group (CIDG) Director Major General Nicolas Torre sa pagbantay sa Ninoy Aquino International Airport Terminal 3 alang sa probisyon nga tabang ngadto sa Philippine Center on Transnational Crime (PCTC) alang sa pag-implementar sa Interpol Notice alang kang Duterte sa iyang pag-abot gikan Hong Kong.
Matud sa PNP nga nagpakatap sila og 379 ka sakopo sa NAIA ug uban pang mga nag-unang lokasyon aron nga maseguro ang malinawon ug hapsay nga proseso.
Gikan sa airport, gidala si Duterte ngadto sa VIP lounge sa Villamor Airbase.
Gibasa ni Torre ang Miranda Rights ngadto kang Duterte, kon diin uban sa iyang mga abogado nangayo og legal nga basihan sa pagdetiner kaniya. (TPM/SunStar Philippines)