NANAWAGAN ang City Transport and Traffic Management Office (CTTMO) sa mga operators sa Public Utility Jeepney (PUJ) nga magsugod na og apply alang sa bag-ong giimplementar nga "two-year franchise validity" alang sa ilang mga yunit.
Sa paghinabi uban ang DXDC RMN Davao sayo ning semanaha, gikompirma ni Dr. Chona Advincula, pangulo sa Motorized Vehicle Franchising and Regulatory Division (MVFRD), nga ang ilang buhatan nagproseso na sa mga aplikasyon. Apan iyang gitin-aw nga ang kasmatangan nga "coverage" nagtugot pa lang sa PUJ units nga narehistro sukad Nobyembre 8, 2023.
Giila sab ni Advincula nga daghang mga operators nag-lobby alang sa "three-year validity". Bisan pa niini, ang Davao City Council nagtugot lang sa "two-year franchise term", nahisubay sa updated transport policies sa dakbayan.
Kini nga policy shift nakaangkla sa bag-ong legislative nga kausaban. Niadtong Pebreo 18, 2025, nag-aproba ang Davao City Council og kausaban sa Comprehensive Traffic Code through City Ordinance No. 0334-12 sa dakbayan. Gipangamahan ni Konsehal Conrado Baluran, tsirman sa committee on transportation and communications, ang ordinansa naglugway sa balidad sa Motorized Transport Operator’s Permit (MTOP) gikan usa ka tuig ngadto sa duha ka tuig.
Ang kausaban nagtumong "to reflect the city’s evolving traffic landscape and streamline permit renewals for transport operators."
Ang mga polisiya nagsuporta sa public modernization of transportation sa nasudnong kagamhanan.
Kini nga programa nag-awhag sa mga local government units nga ipahaum ang franchising policies sa tumong nga dunay kalambigitan sa "regulatory efficiency, road safety, and environmental sustainability." (David Ezra Francisquete)