DUNA nay persons of interest ang mga awtoridad sa giingong mga suspek nga nipusil patay sa dalaga alas 8:00 sa gabii, Martes, Mayo 14, 2024 sa General Santos City.
Ang biktima giila nga si May Anne Tezado, 24-anyos ug nagpuyo sa Barangay San Jose, General Santos City.
Sumala kang General Santos City Police Office (GSCPO) Director Colonel Diocomedes Alaivar nga sakay si Tezado sa iyang motorsiklo pauli na unta sa iyang gipuy-an gikan sa gi-trabahoan niini.
Apan pag-abot sa biktima sa Purok Tomasa, Barangay Calumpang sa siyudad, kalit lang nibutho ang riding in tandem suspects ug gipusil siya gamit ang kalibre .45 nga pistola.
Abtik sab nga niikyas ang mga suspek paingon sa sentro nga bahin sa dakbayan.
Patay gilayon ang dalaga nga nakaangkon og samad pinusilan sa iyang ulo.
Hinuon, kapulisan sa Gensan wala pa panganli ang mga POIs gumikan padayon pa ang ilang gihimong imbestigasyon. (Edgar E. Fuerzas)