Pulis gipusil, nibawos suspek

GIPANGITA karon ang nakaikyas nga suspek kinsa nagpusil sa pulis alas 6:05 sa gabii, Agosto 17, 2024, sa Cotabato City.

Ang pulis nga gipusil giila nga si Police Corporal Mohammed Ersad Ampatuan, sakop sa Traffic Enforcement Unit sa Cotabato City Police Office.

Gibutyag ni Cotabato City Police Office Director Colonel Joel Estaris nga sakay ang pulis sa iyang motorsiklo, duol sa kanhi buhatan sa Bangko Sentral ng Pilipinas sa kanto Sinsuat Avenue sa dakbayan.

Apan kalit lang misulpot sa likod nga bahin sa biktima ang suspek sa stop light ug gipusil ang pulis gamit ang kalibre .45 nga pistola.

Apan nakabalos og pusil ang samaron nga pulis batok sa suspek ug natumba ang gisakyan niini nga motorsiklo hinungdan nga nidagan na lang kini.

Giilog sa suspek ang motorsiklo sa habal habal drayber ug dayong sibat, biniyaan ang iyang unang gisakyan nga motor nga natumba.

Ang samarong pulis daling gidala sab ngadto sa Cotabato Regional and Medical Center (CRMC) ug giingong luwas na sa makuyaw nga kahimtang. (Edgar E. Fuerzas)