NAG-UGAT sa panaglalis sa kapuyo nga nisampot sa pagpamusil sa opisyal sa kapulisan alas 8:30 sa buntag, Lunes, Marso 24, 2025, sa General Santos City.
Giila ang biktima nga si Police Lieutenant Joseph Miasan Denaga, 50-anyos, kasamtangang nakadestino sa Drugs Enforcement Group sa Police Regional Office XII.
Samtang ang suspek mao mismo ang kapuyo nga pulis ni Denaga nga si Patrolman Kamille Kaye Asuncion, 29-anyos, pulos nagpuyo sa Lansang Village, Barangay Sinawal, General Santos City.
Sumala kang GSCPO Director Police Colonel Nicomedes Olaivar Jr. nga nangayo og tambag ang suspek nga si Patrolman Asuncion kang Lieutenant Denaga kung unsay angay niyang buhaton tungod gina-bully matud pa kini sa iyang trabaho.
Gitubag lamang matud pa kini sa biktima og "B*liw pa mental ka na."
Didto na miulbo ang lalis sa duruha ug tungod sa kasuko sa babaye nga pulis gipusil niya si Denaga gamit ang 9mm pistol.
Gidala dayon ang biktima sa balay tambalanan ug anaa matud pa sa grabe nga kahimtang nga dunay samad pinusilan sa bukton ug dughan.
Gidakop dayon sa mga pulis si Patrolman Asuncion ug gitakda nga pasakaan og tukmang kaso. (Edgar E. Fuerzas)