GENERAL SANTOS CITY -- Balhog na sa prisohan ang ugangan nga nipusil patay sa sakop sa Philippine National Police (PNP) alas 10:00 sa gabii, Huwebes, Hunyo 26, 2025, sa probinsiya sa Sultan Kudarat.
Giila ang biktima nga si Staff Sergeant Bobby Vegafria Nanali, 37 anyos, minyo, ug nagpuyo sa Purok Magic Rose, Barangay Poblacion, President Quirino, Sultan Kudarat.
Sumala kang Sultan Kudarat Police Provincial Office (SKPPO) Director Police Colonel Bernard Lao nga nagkalalis ang biktima ug iyang asawa gumikan sa personal nga problema sa pamilya.
Ang grabeng panaglalis sa magtiayon nisampot sa pag-iniluganay sa pusil nga Glock-17 nga gipanag-iyahan sa pulis.
Nailog sa asawa ang pusil sa iyang bana ug gihatag ngadto sa iyang inahan.
Human sa lalis, nilakaw si Nanali sa ilang garahe ug gisundan sa iyang asawa ug ugangan.
Kalit lang gipusil ang pulis sa iyang ugangan nga naigo sa tiyan nga nilapos sa likod nga bahin sa lawas.
Nadala pa ang biktima sa Tomboc-Salayog Hospital apan nabugtoan gihapon sa kinabuhi.
Gidakop sa mga pulis ang ugangan ug asawa sa biktima ug gibalhog sa prisohan ug gitakda nga pasakaan og tukmang kaso. (Edgar E. Fuerzas)