GIBALHOG sa prisohan ang usa ka pulis nga namaligya og mga armas alas 8 a.m., Miyerkules, Agosto 7, 2024, sa Cotabato City.
Giila ang suspek nga si alyas Mhie, dunay ranggo nga Police Master Sergeant nga nadestino sa Sultan Kudarat Municipal Police Station sa Sultan Kudarat, Maguindanao del Norte.
Gibutyag sa Criminal Investigation and Detection Group-Bangsamoro Autonomous Region (CIDG-BAR) nga nagpahigayon sila buy-bust sa Barangay Rosary Heights 13, Cotabato City.
Sa dihang nagpositibo ang operasyon, daling gisikop si alyas Mhie apan ang kauban niini nakaikyas.
Nakuha gikan sa posisyon sa pulis ang duha ka M16 rifles, lima ka steel magazines ug 100 ka bala sa 5.56.
Nakuha usab sa maong operasyon ang marked money nga nagkantidad og P160,000.
Anaa na karon sa kustodiya sa CIDG Maguindanao Police Force Unit Office ang mga ebidensiya alang sa tukmang dokumentasyon ug disposisyon samtang ang suspek nag-atubang na og kasong kalapasan sa Republic Act 10591. (EEF)