BALHOG karon sa prisohan ang usa ka giilang Top 1 Regional Level High Value Individual nga nakuhaan og P1.2 milyon kantidad sa gituohang shabu human nga nasikop sa kapulisan atol sa gihimong buy-bust sa Pag-asa Street, Barangay 25-C, Davao City alas 8:00 sa gabii, Miyerkules, Agosto 13, 2025.
Ang suspetsado giila lamang sa alyas nga Utol, 52-anyos, usa ka purok leader, lumad sa Marawi City apan kasamtangang nagpuyo sa Purok 23-C, Boulevard, siyudad sa Davao.
Sumala sa imbestigasyon sa Sta. Ana Police Station, napalitan og usa ka
pakite sa gituohang shabu si Utol gamit ang gipaon nga kuwarta sa mga operatiba. Human sa transaksiyon, dali siyang gidakop.
Narekober sa kapulisan gikan sa posisyon sa suspek ang duha ka selopin nga adunay sulod nga ilegal nga druga, usa ka tinuod nga P1,000 nga bill, 99 ka peke nga P1,000 nga giandam sa kapulisan isip buy-bust money, usa ka selpon, ug motorsiklo.
Narekober sab ang ilegal nga druga nga motimbang sa 190 gramos nga ang kantidad miabot sa P1,292,000.
Ang dinakpan kasamtangang gikuptan sa kustodiya sa kapulisan ug mag atubang sa kasong paglapas sa Republic Act 9165 o Comprehensive Dangerous Drugs Act of 2002.
Padayon karon ang imbestigasyon sa awtoridad aron masuta ang mas lapad nga koneksiyon sa suspetsado ngadto sa iyang mga parokyano. (Jeepy P. Compio)