ISIP pagpangandam alang sa Davao Interim Bus Service (DC Bus), gisugdan sa City Government of Davao ang usa ka bulan nga skills development training alang sa 22 bus drivers ug 22 bus assistants.
Mga nagbansay - kanhi mga drayber sa public utility jeepney (PUJ) nga dunay NC III certification sa pagmaneho—gipili aron nga momaneho sa 10 bus nga napalit sa lokal nga panggamhanan.
Nalakip sila inisyal nga hugna sa giila nga PUJ drivers kinsa magserbi isip benepisyaryo kung ang Davao Public Transport Modernization Project (Davao Bus Project) sa nasudnong panggamhanan mahimo nang makabiyahe.
Ang pagbansay, nga nagsugod niadtong Agosto 5, naglangkob sa basic "life support, technical driving skills and refresher courses, city’s culture of security, gender sensitivity, and practical training and assessment."
Gipalutaw ni Atty. Tristan Dwight P. Domingo, Davao Bus Project Manager, ang kamahinungdanon sa kaluwasan sa dalan ug serbisyo sa mga pasahero.
“Ang basic nga road rules we have to comply. Ang pamatasan sa dalan ug sa padulong sa atoang mga pasahero puhon atoang tumanon,” pagpasabot niya.
Gidasig sab ni Domingo ang mga personahe sa Civil Security Unit (CSU) kinsa mouban sa mga bus drivers ug assistants atol sa ilang matag adlaw nga biyahe nga motabang sa pagpasabot sa mga polisiya sa DC Bus ngadto sa mga sumasakay.
“Atoang mga CSU tabang ta og pasabot sa mga pasahero unsa’y mga bawal,” padayag niya.
Ang DC Bus magserbi isip interim solution sa mga hagit sa transportasyon sa siyudad. Magkomplemento kini sa Peak Hours Augmentation Bus Services (PHABS) ug PUJs, sa pagbiyahe sa mga adlaw'ng Lunes ug Sabado atol sa mga peak hours.
Makapahimulos ang mga Dabawenyo sa serbisyo nga libre sa "first-come, first-served basis."
Ang 10 ka bag-ong bus gilauman nga moabot sa uwahing bahin sa Septyembre, samtang ang gipunting nga paglunsad niini gitakda sa Oktubre. (PR)