GITIGOM sa City Government of Davao niadtong Huwebes ang Inter-Agency Task Force (IATF) nga maoy mag-monitor sa public utility vehicles (PUVs) ug magpakgang sa mga insidente sa sobrang paningil og pasahe ug mangontrata og mga pasahero.
Gibutyag ni Atty. Eduardo Perez IV, Acting Head sa City Transport and Traffic Management Office (CTTMO), atol sa ISpeak Media Forum nga ang IATF gitigum aron nga hisgutan ang mga katikaran ug mga taho apil na ang pagpaniid sa mga reklamo may kabahin sa PUVs.
Gilangkuban ang IATF og mga miyembro gikan sa sektor sa transportasyon apil ang CTTMO, Land Transportation Franchising and Regulatory Board-XI (LTFRB-XI), Land Transportation Office (LTO) XI, Philippine National Police-Traffic Enforcement Unit (PNP-TEU), City Planning and Development Office (CPDO), Civil Aviation Authority of the Philippines (CAAP), City Information Office (CIO)-Davao City Reports (DCR), Davao City Overland Transport Terminal (DCOTT), ug Committee on Transportation and Communications sa Sanggunian Panlungsod.
Kadaghanan sa mga taho nga gipresentar atol sa tigum mao ang mga reklamo nga gipadala sa DCR, ang opisyal nga "grievance platform" sa City Government of Davao.
Esplikar ni Perez nga tungod kay ang transport and traffic management dunay halapad nga tahas, nagkadaiyang matang sa isyu ang giatiman sa nagkadaiyang ahensiya.
Giklaro sab niini nga ang regulatory capacity sa CTTMO limitado lang ngadto sa ubang PUVs apil ang mga motorized tricycle nga pangpasahero ug kadtong gigamitan lang og sikad, samtang ang pag-regulate sa pasahe sa mga taksi naa ilawom sa LTFRB.
Dumalahon sa IATF ang mga reklamo sa mga pasahero nga dunay kalambigitan sa PUV sama sa sobrang pagpaningil og pasahe, mangontrata, mobalibad sa pagpasakay o paghatud sa pasahero sa ilang destinasyon, abusado o reckless driver nga kinaiya.
Lantawon sab niini ug segurohon nga ang mga drayber sa PUV ug operators matinumanon sa mga balaod ug polisiya sa kaluwasan sa dalan ug operasyon sa transportasyon.
Mga Dabawenyos kinsa nakasinati sa mga insidente nga dunay kalambigitan sa PUV sama sa sobrang paningil og pasahe, mangontrata og mga pasahero, ug mobalibad o pakyas nga mapasabot sa mga pasahero mahimong mosang-at sa ilang reklamo pinaagi sa DCR Web App: https://reports.davaocity.gov.ph/ o pinaagi sa pagpadala sa mga reklamo sa email: davaocityreports@davaocity.gov.ph.
Puwede sab makapadala ang publiko sa ilang mga taho ngadto sa DCR numbers: 0917 131 2333 o 0919 072 2222; o padala og mensahe sa ilang Official Facebook Page: https://www.facebook.com/davaocityreports. (Uban sa taho sa CIO-Davao)