PWD giulan og tabang sa netizens

PWD giulan og tabang sa netizens
Hulagway gikan kang Ry Llanes

NAGTINABANGAY ang mga netizens aron makapaabot og tabang sa person with disability (PWD) nga nabanggaan sa depasaheroang multicab nga gabiyahe sa Buhangin, Davao City niadtong Mayo 10 ning tuig.

Pinaagi sa usa ka indibiduwal, Ry Llanes, nakatigum og salapi, ug mga tabang alang sa biktima nga si Tatay Jun.

Kahinumdoman nga samtang sakay ang biktima sa iyang wheelchair ug gitulak sa usa ka kauban, kalit silang gibundol sa dyip nga gimaneho ni Christian Louie Villocorta Saguid, 31, taga Prk. 1 Omila, CMPD, Tagum City.

Subay sa Facebook post ni Llanes nga nagdumili sa pagpatsek-ap sa ospital si Tatay Jun sa kabalaka nga i-admit siya ug wala nay makapanginabuhi kanila.

Ang hitabo miresulta sa samad sa iyang ulo ug pangos sa ubang bahin sa iyang lawas.

Di na sab magamit ang wheelchair sa biktima human naguba sa insidente.

Mga netizens nga natandog sa kahimtang ni Tatay Jun, mihatag og pinansiyal nga tabang ngadto kaniya nga giagi kang Llanes.

Si Tatay Jun midawat og crutches, grocery, wheelchair ug uban pang ayuda sa panaghiusa sa mga netizens.

Sa pikas bahin, gituol na sab ang kaso ni Tatay Jun sa usa ka abogadao, kung unsa ang legal nga aspetong mahimo nga matabang ngadto kaniya. (Rhona Goc-ong-Villariasa)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph