GITUBAG na ni Noe “Butchoy” Taojo ang dugay nang pangutana sa katawhan: ngano man gyud siya misulod sa politika nga nagpapili isip kongresista?
Sumala ni Butchoy, ang iyang pagdagan dili alang sa personal nga ambisyon, kundili usa ka sakripisyo—usa ka paningkamot aron hiusahon ang mga lider sa politika sa probinsiya sa Davao de Oro.
“Sa sinugdanan, ang rason sa akong pagdagan mao ang pagsakripisyo aron mahiusa ang mga lider sa politika ug makabaton og kalinaw ning atong probinsiya,” matud pa ni Butchoy.
Apan human sa daghang paglibot ug personal nga pakig-uban sa katawhan sa matag lungsod, mas milawom ang iyang pagsabot sa tinuod nga panginahanglan sa distrito.
“Sa sige nako’g tuyok sa matag lungsod, mas milawom ang akong pagbati ug panlantaw—daghan pang lugar sa Distrito Dos ang nagkinahanglan og pagpangga ug pagtagad,” dugang ni Butchoy.
Nakita niya nga ang pagserbisyo sa katawhan dili lang kutob sa pagpanghatag og ayuda. Kini kinahanglan og tinud-anay nga programa ug proyekto nga molungtad ug makatabang sa daghang sektor sa komunidad.
“Tinuod nga adunay ayuda sa gobyerno, apan dili kana igo—dali ra mahurot, ug pipila ra pud ang mahatagan,” pasabot niya.
Alang kang Butchoy, ang tinuod nga katuyoan sa iyang pagdagan usa ka tawag sa Ginoo—aron mahimong instrumento sa paghatud og makatawong gobyerno, tinuod nga serbisyo publiko, ug malungtarong kausaban.
“Seguro, mao kini ang dakong katuyoan sa Ginoo ngano ania ako karon, magpapili isip inyong Representante sa Kongreso—aron mapaabot kaninyo ang tinud-anay nga serbisyo, mapundohan ang mga programa ug proyekto alang sa tanang sektor, gikan sa pinaka-bata hangtud sa pinakahamtong, ug padayong ipaambit ang gasa ug panalangin nga akong nadawat gikan sa kahitas-an.”
Busa, giawhag ni Butchoy ang katawhan sa Davao de Oro nga ubanan siya sa iyang damgo alang sa usa ka mas malinawon, mas lig-on, ug mas progresibong probinsiya.
Uban sa iyang plataporma nga TAO:
• Trabaho ug Negusyo
• Agrikultura ug Panginabuhian
• Oportunidad para sa Tanan
Kini nga mga programa, matud pa ni Butchoy, dili lamang para sa pipila ka sektor, kundili para sa tanan—gihan-ay, gipangandaman, ug giuyonan sa tinuod nga katuyoan sa pagserbisyo. (PR)