NI-AKSIYON na karon ang Digos City Police Station ug ang Davao del Sur Police Provincial Office aron masuta kon tinuod ba ug aron masulbad ang reklamo sa usa ka abogado nga nag-akusar og alegasyong pagpangutong sa checkpoint sa Colorado, Digos City.
Sa usa ka interbyu pinaagi sa dxDC RMN Davao, gipadayag ni "Atty. Marky" nga personal nga niadto sa iyang opisina si Police Lieutenant Colonel Glen Ipong, hepe sa Digos City PNP, kauban ang mga representante sa Davao del Sur Police Provincial Office aron atubangon ang isyu ug magsugod sa imbestigasyon.
Sumala sa abogado, seryuso ang iyang reklamo ug gilauman nga aksiyonan kini sa insaktong paagi aron dili na kini mausab sa umaabot. Giawhag sab niya ang publiko nga ibalik ang ilang pagsalig sa kapulisan ug motabang sa pagmentinar sa moral ug integridad sa serbisyo.
Gipasalig usab sa abogado nga iyang tumong mao ang pagprotektar sa katawhan ug hustisya, human iyang gi-post sa social media ang iyang akusa nga gikotongan ang iyang kliyente sa maong checkpoint.
Padayon karon ang paningkamot sa SuperBalita Davao sa pagkontak sa Police Regional Office (PRO) Davao Region aron makuha ang ilang pahayag kabahin sa isyu, apan wala pa kini mipagula og opisyal nga pamahayag sa pagsulat ning balita.
Nagpaabot ang publiko sa resulta sa imbestigasyon ug posibleng aksiyon batok sa mga pulis nga nalambigit sa maong alegasyon. (Jeepy P. Compio)