GIHATAGAN ni House Speaker Martin Romualdez si Davao City Representative Paolo Duterte og travel clearance alang sa iyang personal trip ngadto sa 18 kanasuran gikan Marso 20 hangtud Mayo 10, 2025.
Ang opisyal nga dokumento, Travel Clearance No. IPRS-0325-PT7599, gipirmahan ni House Secretary General Reginald S. Velasco, nagtugot kang Duterte nga mobisita sa Hong Kong, China, Malaysia, Indonesia, South Korea, Japan, Vietnam, Cambodia, United States, Australia, United Kingdom, Netherlands, Germany, France, Belgium, Italy, ug Singapore.
Ilawom sa House rules, mga magbabalaod kinahanglan nga mokuha og opisyal nga clearance alang sa iyang biyahe sa langyaw nga kanasuran, usa ka pribilihiyo nga ihatag sa Speaker of the House. Apan si Rep. Duterte wala mohatag og espisipiko nga tumong sa iyang mga biyahe.
Kasamtangan, si Vice President Sara Duterte naa sa The Hague, Netherlands, kon diin iyang amahan, kanhi President Rodrigo Roa Duterte, nag-atubang og pagtaral sa International Criminal Court (ICC) tungod sa crimes against humanity nga dunay kalambigitan sa iyang war on drugs.
Ang opisyal nagpadayag sa iyang pasalamat ngadto sa mga komunidad nga Pilipino sa Europe sa pagpasiugda og panagtigum sa pagsuporta sa iyang amahan ug subling nagsulti nga malaumon siyang makabalik sa Pilipinas si Duterte.
Samtang, iyang gibutyag sa paghinabi kaniya sa Media nga ang iyang igsuong babaye, Veronica Duterte, gilaumang moduyog kaniya sa Netherlands sa di pa ang ika-80 anyos nga adlaw nga natawhan sa iyang amahan sa Marso 28.
Dugang pa niini, gikompirma sab ni VP Sara ang iyang inahan, Elizabeth Zimmerman, ug iyang kasamtangan nga partner sa iyang amahan, Honeylet Avancena, gitakda sab nga moabot sa The Hague atol sa selebrasyon sa iyang adlaw nga natawhan.
Samtang si Paolo Duterte wala pa makaabot sa Netherlands, iyang manghod nga igsuon, Davao City Mayor Sebastian Duterte, di moduyog kanila tungod sa iyang campaign commitments sa Davao City.
Nihatag sab si Duterte og mga katikaran sa panglawas sa iyang amahan, nga nagkanayon nga siya gibalhin gikan sa ospital sulod sa Scheveningen Prison ngadto sa regular room sa gitawag og "Hague Hilton," kon diin mga suspek sa ICC gidetiner.
"Earlier, the doctor advised him to walk more, and I suggested he request permission to walk outside. The doctor said he could ask security for that," matud niya. (David Ezra Francisquete)