SAN PEDRO SQUARE -- Gibutyag ni First District Representative Paolo “Pulong” Duterte nga kini ang una niyang higayon nga nakasinati nga mga kongresista hadlok sa ilang house speaker.
Matud ni Rep. Duterte nga nakaserbisyo na siya ilawom sa tulo ka mga house speakers uag kini mao sila Jose C. Alvarez, Alan Peter Cayetano, ug Lord Allan Velasco apan kini maoy unang higayon nga nakatayming siya og mga kongresista hadlok sa ilang speaker. Hadlok silang malagpot sa kongreso. Sama pananglit sa nahitabo kang Negros Oriental Third District Rep. Arnolfo “Arnie” Teves Jr. kinsa gisuspende ni House Speaker Martin Romualdez.
Iyang gipadayag nga mao pud unta ang mahitabo kaniya tungod sa gialegar nga si Puwersa ng Bayaning Atleta (PBA) Patylist Representative Margarita “Miggs” Nograles nagplano na niini.
“Didtoa pud ko padulong segurado. Gi-andaman nako anang partylist nga babae dira. Nagtuo siya nga wala ko kabalo. Sige, gusto ka dai mag hearing tas congress,” hagit ni Paolo atol sa prayer rally, Dominggo sa gabii, Enero 28, 2024, sa San Pedro Square.
Dugang pa niya nga human gibuhian ang iyang pahayag bahin sa People’s Initiative (PI) sa Charter Change, iyang kaaway sa Manila sugod na og bawos batok kaniya.
"Unsa nay mogawas sa akoang baba karon ilaha nang lisuon against sa akoa ana na ilang trabaho," tug-an niya.
Tug-an sab ni Paolo nga gitawag siya sa iyang mga kaaway isip "drug smuggler" ug kanhi giakusahan sa amahan ni Margarita, Prospero Nograles, isip usa ka "drug addict".
“Ug drug smuggler ko, datu na unta kaayo ko. Ngano naa pa man ko sa inyong atubangan karon. Nganong moserbisyo pa man ko ninyo?” pangutana niya sa mga tawo.
Dugang ni Paolo nga human niya makita ang iyang igsuon, Davao City Mayor Sebastian “Baste” Duterte, nga namulong atol sa "Hakbang ng Maisug-Leaders Forum for Transparency, Accountability, Peace, and Security" sa Grand Men Seng Hotel, Magallanes, Davao City, siya pud gustong mopasibaw sa iyang mga kabalaka bahin sa People's Initiative.
Apan sukwahi sa pasiaw ni Sebastian nga posibleng molupad siya padulong sa Indonesia alang political asylum, siya magpabilin dinhi sa Davao, ug nagsulti, “Diri ko natawo, diri ko mamatay.”