DAGHANG mga tag-iya og restawran sa Davao City nakamatikod og pagtaas sa peke nga persons with disabilities identification cards (PWD IDs) nga gigamit sa mga indibiduwal aron nga makapahimulos sa 20 porsiyento nga diskuwento sa mga pagkaon sa establisemento nga gimando sa balaod sa Pilipinas.
Sumala ni Benjie Lizada, presidente sa Restaurant Owners Association of Davao City Incorporated, human sa pag-aproba sa Republic Act 10754, ang Act Expanding the Benefits and Privileges of Persons with Disability (PWD), mga indibiduwal nigamit niini isip bentaha pinaagi sa pagmugna og peke ug kinopya nga IDs aron nga makapahimulos sa pipila ka serbisyo sa restawran ug uban pang mga negusyo.
“We are coordinating right now with Resto PH, an association of restaurant owners in Manila to address the problem of fake cards. There is a proliferation of fake PWD cards. Malaki ang tama sa amin ito," matud ni Lizada atol sa Business Matters media forum niadtong Biyernes, Nobyembre 29, 2024.
Apan gitin-aw sa opisyal ngadto sa mga tigbalita sa Davao nga wala silay isyu bahin sa paghatag og diskuwento ngadto sa lehitimong mga miyembro sa sektor sa PWD apan ang naghitak nga wala masusing IDs magdala og negatibong resulta ngadto sa mga negusyo sa kinatibuk-an, ilabi na sa pipila ka mga establisemento nga wala pa makarekober gikan sa krisis dala sa Covid-19 nga pandemya.
Kini tungod kay ang diskuwento naa sa tanan mga restawran sa nasud subay sa gipahayag ni Lizada nga giabaga sa pribadong mga kompaniya ug patigayon.
Gikanayon sa opisyal kinsa mao sab ang sectoral representative sa restaurant sector alang sa tourism sa Davao City, di nila madeterminar kung ang tawo nga nagbaton niini kuwestiyonable o legal nga valid IDs kay kadaghanan niini mabaligya lang sa bisan asa.
Ang pamilyang Lizada, nga nanag-iya og pipila ka mga restawran sa Davao City, dugang nagkanayon nga ang paagi aron nga masulbad ang isyu mao ang pagrekomenda sa paggamit og National IDs kung mopahimulos sa diskuwento.
Dugang ni Lizada nga ang siyudad nakita ang pagsira sa pipila ka mga restawran sukad pa sa pandemya.
"The city recorded 889 restaurants in 2019, but as of October 2024, there were only 658 left," butyag niya.
Niadtong 2019, 3,193 ka establisemento ang girehistro ug gi-renew sa siyudad. Kini naglakip sa mga restawran, tourism-related businesses, lodging, travel and tours, ticket offices, spas, resorts, tour guides, ug souvenir gift shops.
Apan, sukad Oktubre 2024, mga 997 ka mga commercial establishments nihunong na sa pag-operate.
Ubos sa Republic Act 10754, o “Act Expanding Benefits and Privileges for with Disability,” ang mga PWDs libre gikan sa value-added tax ug mahimong makapahimulos sa minimum 20 porsiyento nga diskuwento "the fees and charges relative to the utilization of all services in hotels and similar lodging establishments; restaurants and recreation centers." (David Ezra Francisquete)