GIPALIG-ON sa Armed Forces of the Philippines (AFP) ang ilang panawagan sa kabatan-onan ug sa mga sibilyan nga mosalmot sa Reserve Officers' Training Corps (ROTC) ug sa reserve force programs isip kabahin sa ilang estratehiya alang sa nasyonal nga seguridad ug kahimtang sa panalipod sa rehiyon.
Gibutyag ni Colonel Calixto D. Cadano Jr. sa press briefing uban sa Davao Peace and Security Press Corps nga sa miaging lima ka tuig pa lang, kapin 100,000 hangtud 110,000 ka estudyante na ang nakagraduwar sa ROTC sa Davao Region.
Apil na sa ilang ihap ang mga nahimong milyon-milyon ka reserve graduates sukad sa 1990 human mipasar ang Republic Act 7077 kun Citizen Armed Force of the Armed Forces of the Philippines Reservist Act.
Apan, ang problema karon mao ang pagsubay ug pag-mobilize sa mga mi-graduate na nga daghan sa ila tua na sa gawas sa nasud o sa ubang rehiyon.
“The challenge here is how can we have contact with those standby reserves. They are in other countries, or other regions, for survival and for their families. Kaya siya tinawag na standby reserve kasi wala tayong control,” matud ni Cadano.
Ang AFP nagpadayon sa ilang implementasyon sa tulo ka pamaagi sa pagpalig-on sa reserve force: ROTC para sa mga estudyante sa kolehiyo, Basic Citizen Military Training (BCMT) para sa mga out-of-school youth ug sibilyan, ug Affiliated Reserve Units (ARU) nga naglangkob sa mga espesyalisadong sektor sama sa pagkaon, tubig, komunikasyon ug transportasyon.
Matud ni Cadano, ang mga programa naglangkob og mga training modules sa emergency response, disaster relief, warfighting, nation-building, ug socio-economic development.
“Embedded na sa curriculum ng ROTC and BCMT yung skills for emergency response, disaster relief, warfighting, nation-building, and socio-economic development,” sulti ni Cadano.
Gipunting sa AFP nga ang ilang ready reserve units sa Davao Region adunay parehas nga training ug estruktura sa regular force, lakip ang infantry, artillery, ug signal battalions.
Sa pagkakaron, adunay 3,500 ka mga ready reservists sa rehiyon nga andam i-deploy kung ipatuman ang full mobilization pinaagi sa mando sa Kongreso ug Presidente.
Bisan pa nga walay suweldo ang mga reservists, giila gihapon ang ilang dakong papel sa nasud alang sa seguridad ug kaluwasan.
Nakadawat sila og parehas nga training, leadership development, ug oportunidad nga makatuon sa gawas sa nasud.
Bisan walay kompensasyon, nagpadayon gihapon silang nagsilbi tungod sa ilang tinuoray nga patriotismo ug gugma sa nasud. (Shema Kailah B. Sacman, AdDU Intern)