GIHANGOP ni Bangsamoro Interim Chief Minister Abdulraof Macacua ang lakang sa National Amnesty Commission (NAC) sa pag-isyu og safe conduct pass ngadto sa mga sakop sa Moro Islamic Liberation Front (MILF) ug Moro National Liberation Front (MNLF) nga adunay mga pending nga kaso, taliwala sa nagpadayon nga proseso sa amnestiya.
Matud ni Macacua nga ang maong inisyatibo usa ka makasaysayanong pag-ila sa pakigbisog sa mga rebolusyonaryong grupo sa Mindanao.
Gitumbok usab ni Macacua nga ang safe conduct pass nagsilbi nga proteksiyon sa mga aplikante sa amnestiya samtang gi-verify ang ilang mga dokumento.
Ubos sa nasangpit nga polisiya, mga aplikante nga adunay balido nga safe conduct pass dili mahimong dakpon o prisohon, basta anaa pa sila sa proseso sa aplikasyon.
Dugang pa ni Macacua nga ang bag-ong memorandum nga gipirmahan ni Presidente Ferdinand Marcos Jr. niadtong Abril 2025 tataw nga nagpakita sa seryuso nga tuyo sa nasudnong kagamhanan sa pagpalambo sa tinuod nga panaghiusa. (Edgar E. Fuerzas)