USA ka dalaygon nga buhat sa pagkamatinud-anon ug kaligdong ang gipakita ni Davao City Civil Security Guard (CSG) Nelson Cayetano human niya giuli ang usa ka belt bag nga adunay sulod nga P239,600 nga cash.
Si Cayetano nagpahigayon sa iyang naandan nga pagpatrolya sa entrada sa Davao City Hall niadtong Martes sa gabii, Marso 11, 2025 sa dihang iyang nakit-an ang usa ka bag.
Iyang nasuta nga dunay sulod nga cash ang belt bag, hinungdan nga iya dayon kining gitunol ngadto sa opisyal sa entrance desk sa City Hall.
Human sa 25-minutos, niabot si Police Corporal Karlo Concha Bacero, sakop sa Philippine National Police gikan sa Cotabato City, aron i-claim ang bag.
Si Bacero, kinsa niabot sa Davao City niadtong Marso 10 alang sa operasyon sa iyang anak, nipasabot nga ang kuwarta gi-loan aron mabayran ang gasto sa pagpatambal.
Iyang giasoy kung giunsa niya aksidenteng nabiyaan ang belt bag samtang nagpakuha og hulagway sa City Hall.
Ang kuha sa closed circuit television (CCTV) camera sa City Hall nag-verify sa account ni Bacero nga nagpamatuod nga siya ang tag-iya sa bag.
Si Bacero nipadangat sa iyang kinasingkasing nga pasalamat sa City Government of Davao sa epektibong pagdumala niini.
Ang "act of integrity" nagpakita lamang sa dedikasyon sa City Government of Davao sa pag-ugmad sa kultura sa pagsalig ug kalidad sa serbisyo publiko sa mga empleyado niini. (Jeepy P. Compio)