BISITAHON sa Southern Philippine Medical Center (SPMC) ang mga tulunghaan sa Davao City aron nga i-promotar ug sakto nga i-demonstrar ang panghugas og kamot aron nga mapakgang ang pagkatag sa mga sakit nga makatakod.
Namulong sa Kapehan sa Dabaw, gibutyag ni Dr. Marie Yvette C. Barez, infectious diseases specialist sa SPMC, nga bag-ohay lang nila gilunsad ang maong proyekto sa pakig-alayon uban ang City Government of Davao, nagkomplemento sa inisyatibo sa lokal nga panggamhanan nga magpahimutang og mga hugasanan og kamot sa matag tulunghaan sa tibuok dakbayan.
“We have a project in SPMC where we teach young children in schools the proper way of handwashing. We started it in Agdao, but this initiative will not be limited to Agdao alone,” pagpasabot ni Dr. Barez.
Dugang pa niya, “We are coordinating with the City Government so that we can extend the campaign to other public and private schools in the city, especially as they begin installing handwashing stations in these schools.”
Tungod sa pagsulpot sa mga sakit nga makatakod, subling gipadayag ni Barez ang kamahinungdanon sa tukmang paghugas sa kamot aron mapugngan ang pagkatag ug pagtakod sa mga sakit nga mananakod.
Kini naglakip sa paghugas sa kamot human mogamit sa kasilyas, una ug human mokaon o pagpangandam sa pagkaon, ug bisan human sa paggamit og mobile phones o paggunit og mga butang nga kasagaran maoy gunitan sa mga tawo sa pampublikong lugar.
Esplikar ni Barez nga ang mga butang nga nakontaminar mao ang mga komon nga paagi kon diin ang mga sakit motakod.
Kini mao ang mga butang ug mga ibabaw nga kasagaran magunitan sa mga tawo, sama sa doorknobs, pindutanan sa elevator, ug selpon, nga magdala ug mopakatag og makatakod nga organismo gikan sa usa ka tawo ngadto sa laing tawo.
Dugang pa niini, gi-esplikar sab ni Barez nga ang saktong paghugas sa kamot naglambigit sa paggamit og sabon ug tubig alang sa espisipiko nga panahon aron nga maseguro nga tanang mga lugar sa kamot, sama sa palad, tudlo, kuko, ug pulso malimpyo.
Apan matud niya nga way espisipiko nga matang sa sabon ang gikinahanglan, basta sabon nga gigamit panahon sa paghugas sa kamot, bisan regular nga bar soap mahimong gamiton.
Bisan tuod kon ang paghugas og kamot gamit ang sabon ug tubig mahimo nga di kanunay praktikal human sa matag kontak sa mga butang, gitambag ni Barez ngadto sa publiko nga magdala og alkohol o alcogel.
Niining paagiha, mahimo nilang i-sanitize gilayon ang ilang mga kamot human makagunit sa mga butang o ibabaw nga kanunay magunitan sa mga tawo.
“Dapat naa kay balon kung wala kay tubig ug sabon naa kay balon na alcohol or alcogel so that you can always clean your hands,” pagtin-aw niya.
Gipaambit ni Barez ang mga komon nga mga sakit nga nalambigit nga mopilit sa "unsanitized objects" naglakip sa "gastroenteritis, an inflammation of the stomach and intestines that typically causes diarrhea, vomiting, abdominal cramps, and sometimes fever, and conjunctivitis, or 'pink eye,'” nga masayran pinaagi sa pagpula, pagkatol, ug pagbasa sa mga mata.
Gipahimug-atan sab niya nga ang paghugas og kamot esensiyal kaayo aron nga mapugngan ang pagtumaw sa makatakod nga sakit sama sa "monkeypox; hand, foot, and mouth disease; influenza"; ug daghan pang uban. (PR)