HINGPIT nang natunol sa City Government of Davao ang 22 ka mga bag-ong disaster response ug emergency nga mga behikulo ug kahimanan, Miyerkules sa buntag, Mayo 28, 2025, atol sa seremonya nga gihimo sa City Hall Grounds sa San Pedro Street ning dakbayan.
Sa 22 ka bag-ong napalit nga yunit, 14 niini gipalit pinaagi sa pundo sa Disaster Risk Reduction and Management (DRRM) sa siyudad, samtang ang nahabiling walo ka behikulo gikuha gikan sa Peace and Order Fund.
Ang maong mga behikulo ug kahimanan gilauman nga makapalambo sa kaandam ug kapasidad sa dakbayan sa pagtubag sa katalagman, sunog, coastal security, ug kalamboang agrikultura.
Apil sa mga kahimanan nga gitunol ngadto sa City Disaster Risk Reduction and Management Office (CDRRMO) mao ang "rubber boat, an ram jack, aengin duo pump, a lie detector device, spreader, three sets of hydraulic hoses (blue, orange, and a double hose reel core), a V-strut, and a mobile high-pressure compressor."
Ang buhatan nakadawat sab og 120 ka rescue helmets uban ang headlamps, duha ka fiberglass multipurpose ladders, ug duha ka portable power stations.
Ang City Engineer’s Office nakadawat og upat ka emergency response vehicles, samtang ang Bureau of Fire Protection-Davao City Fire District gihatagan og upat ka fire trucks ug usa ka command vehicle.
Ang Philippine Coast Guard-Davao Station nakadawat sab og usa ka pick-up truck ug usa ka patient transport vehicle.
Task Force Davao duna say unom ka mobile emergency vehicles ug duha ka pick-up trucks, samtang ang City Agriculturist’s Office nakadawat sab og duha ka farm tractors aron suportahan ang mga inisyatibo sa rural development.
Kini nga inisyatibo nisunod sa samang paningkamot niadtong Disyembre 27, 2024, sa dihang ang lokal nga panggamhanan nitunol og kapin ka 30 bag-ong disaster response assets, apil ang fiber boats, emergency vehicles, ug disaster trucks.
Ang maong mga yunit giapud-apod sa daghang mga buhatan sa dakbayan ug mga ahensiya sama sa CDRRMO, City Engineer’s Office, City Environment and Natural Resources Office, City Transport and Traffic Management Office, Bureau of Fire Protection, Task Force Davao, ug Davao City Police Office.
Subling gikanayon sa mga opisyal sa siyudad nga ang pagpalit sa mga modernong kahimanan nagpakita sa dedikasyon sa Davao City ngadto sa kaluwasan sa publiko, kaandam sa mga katalagman, ug epektibong panggamhanan. (David Ezra Francisquete)