TULO ang patay samtang unom ang naangol sa mga sundalo ug sakop sa Cafgu Active Auxiliary (CAA) sa nahitabong disgrasiya sa Purok 12, Sitio Langag, Barangay Andap, New Bataan alas 9:00 sa buntag, Sabado, Mayo 18, 2024.
Gibutyag nga ang insidente naglambigit sa military truck, KM 450, dunay plaka nga SAB 7366 nga iya sa 25th Infantry Battalion sa 10th Infatry Division, Philippine Army.
Giila ang namatay nga sila Private First Class Jaynor Makakua ug mga CAA nga sila Reynald Balaga ug Ferlan Conception
Samtang mga naangol mao sila 1st Lieutenant Fidel Castro Jr.; Sergeant Michael Arzaga, Corporal Emil Joy Mission, PFC Jonel Alvarado, ug mga CAA nga sila Jay Ar Bale ug Kim Ardel Castro nga pulos mga sakop sa 25th IB, 10th Infantry Division, Philippine Army.
Nasayran nga ang KM 450 nga sakyanan gimaneho ni Makakua nga naglabigar sa dalan subay sa Provincial Road gikan sa Poblacion, Barangay Cabinuangan, New Bataan.
Sakay niini sa maong higayon ang usa ka team sa mga sundalo aron nga motambong sa ipahigayong ground breaking ceremony ug signing sa Inter-Local Agency partnership sa lima ka kilometro nga farm-to-market road opening project gikan sa Purok 1, Sitio Bamboo paingon ngadto sa Purok 12, Sitio Boston, Brgy. Andap, New Bataan.
Apan pag-abot sa nahisgutang lugar partikular sa subidahon nga bahin sa dalan, nawad-a'g kontrol sa sakyanan ang drayber nga si Makakua hinungdan sa pag-atras niini pabalik sa ubos nga bahin hangtud nga nahagbong gikan sa taas nga bahin padulong ngadto sa sapa.
Dead on the spot si Makakua, ingon man ang duha pa ka mga sakop sa CAA nga sila Balaga ug Conception.
Samtang samdan ug naangol ang laing unom nga pulos gipangdala ngadto sa balay tambalanan.
Padayon pa ang gihimong imbestigasyon sa maong insidente. (Dexter T. Visitacion)