MATI CITY, Davao Oriental — Napuhag sa Philippine Davao Drug Enforcement Agency (PDEA) Davao Region ang salag nga shabu-hanan sa Barangay Dahican alas 10 sa gabii, Huwebes, Enero 11, 2024.
Sa report gikan sa PDEA-Davao, katorse gramos ang gibug-aton sa gituohang shabu nga dunay street value nga P95,000 ang narekober sa awtoridad gikan sa posisyon sa ilang target nga si alyas Jessie, 31-anyos.
Atol sa operasyon, naatlan sab nga nag-shabu session ang duha ka mga parokyano sa suspek diin apil sab silang gidakop.
Sumala sa PDEA-Davao nga dunay impormasyon nga miabot kanila sa ilegal nga transaksiyon sa dinakpan hinungdan nga ilaha kining gipailawom sa test buy.
Dihang nagpostibo, gikasa na dayon ang drug-bust operation hinungdan sa malampusong nangasikop ang suspek ug duha niya ka parokyano.
Gawas sa gituohang mga shabu, narekober sab ang mga pinaugang dahon sa marijuana, mga assorted drug paraphernalia ug ang buy-bust marked money.
Kasong pagsupak sa Republic Act 9165 kun Comprehensive Dangerous Drugs Act of 2002 ang atubangong mga kaso sa mga dinakpan. Jeepy P. Compio