NAPUHAG sa hiniusang puwersa sa awtoridad ang usa ka drug den ning siyudad atol sa gihimong ronda sa Philippine Drug Enforcement Agency (PDEA) Davao, Davao del Norte Provincial Office, Naval Forces Eastern Mindanao (NISG) Eastern Mindanao, Philippine Coast Guard Southeastern Mindanao ug sa Panabo City Police Station.
Ang ronda nahitabo alas 9:25 sa gabii, April 12, 2024, Biyernes didto sa Purok 3, Sitio Sta. Cruz, Barangay Malativas, Panabo City, probinsya sa Davao del Norte.
Target sa PDEA sa ilang buy-bust operation, mao ang usa ka alyas Ricky, 29-anyos, kinsa napalitan og usa ka pakite sa gituohang shabu nga mokantidad og P10,000.
Pagdunol sa suspek sa shabu bugti sa boodle money gilayon kining giposasan ug naaktuhan sab ang parokyano niini nga si alyas Ariel.
Dakpan sab ang ka live-in partner sa suspek nga si alyas Marie, ug lain pang usa nga sinaligan sa suspek nga si alyas Tata.
Atol sa operasyon nakuha sab ang laing mga pakite sa gituohang shabu nga motimbang og 17 gramos nga dunay street value nga P115,600, mga assorted drug paraphernalia ug ang buy-bust marked money.
Kasong pagsupak sa Republic Act 9165 kon Comprehensive Dangerous Drugs Act of 2002 ang atubangon nga kaso sa mga suspek didto sa korte. (Jeepy P. Compio)