San Pedro, Claveria, uban pa isira karon

GIPAHIBAWO sa Davao City Transport and Traffic Management Office (DCTTMO) ang temporaryong pagsira sa dalan gikan sa kanto C.M. Recto Avenue padulong sa eskina sa Rizal Street ug Bolton Street sa Sabado, Agosto 10, 2024.

"Temporaryong pasirado sa dalan padulong sa San Pedro St. gikan corner C.M. Recto Avenue ug Rizal Street corner Bolton Street ang ipatuman karong Agosto 10, 2024 (Sabado) para sa hapsay nga pagsaulog sa Coke Studio Concert,” butyag sa DCTTMO sa ilang Facebook post, Biyernes, Agosto 9, 2024.

Ang pagsira magsugod sa ala 1:00 sa hapon ug hangtud matapos ang selebrasyon. Gikanayon sa maong buhatan nga mga behikulo di paagion sa San Pedro Square atol sa pagmuntar sa entablado.

Dugang sab nga gipahibalo nga di makasulod sa San Pedro Street gikan sa kanto sa Bolton Street hangtud Pichon Street, gikan sa kanto sa San Pedro Street padulong sa C.M. Recto Avenue, ug gikan sa Rizal Street padulong Bolton Street.

Alternatibo nga ruta alang sa mga drayber ug motorista mao ang paggamit sa C.M. Recto Avenue padulong sa Rizal Street, unya padulong sa C. Bangoy Street ug Iñigo Street. Kung dunay pagkahuot sa Rizal Street, pakubsan sa CTTMO ang moagi nga mga sakyanan gikan sa C.M. Recto Avenue ug nisuhestiyon nga gamiton ang Bonifacio Street.

Kahinumdoman nga gipahibawo sa Kadayawan Festival niadtong Agosto 7, 2024, nga ang Coke Studio Concert himuon sa San Pedro Square sa alas 6:00 sa gabii karong adlawa, Sabado, Agosto 10, 2024. Pipila sa mga artists nga mopasundayag mao ang ALAMAT, PLAYERTWO, Ian Sison, ug Julia. (RGP)