GIKALIPAY sa lokal nga panggamhanan sa Saranggani nga wala na mahilakip sa Top 10 Poorest Provinces sa Pilipinas ang Sarangani Province.
Gipahibalo kini atol sa Consultative Meeting tali Governor Rogelio "Ruel" D. Pacquiao ug mga barangay officials gikan sa 142 ka barangay sa Sarangani, nga gipahigayon sa Greenleaf Hotel sa General Santos City.
Ang maayong balita gipresentar sa Sarangani Provincial Planning and Development Office, pinangulohan ni PPDO Coordinator Engr. Alain Alcala, kinsa naghisgot sa kahimtang sa kakabos sa probinsiya.
Sumala sa datos, ang poverty incidence sa Sarangani mikunhod gikan sa 36.1 porsiyento sa 2018 (tugbang sa 48,280 ka kabus nga pamilya) ngadto sa 33.5 porsiyento sa 2021 (58,800 ka kabus nga pamilya), ug mius-os pa ngadto sa 30.3 porsiyento sa 2023 (44,740 ka kabus nga pamilya).
Gipadayag ni Pacquiao ang dakong kalipay sa positibong resulta sa ilang paningkamot sa pagpaduol sa serbisyo publiko ngadto sa katawhan, uban sa pagtinabangay sa mga opisyal sa probinsiya, munisipyo, barangay, ug komunidad sa Sarangani.
Dugang pa, nagpadayon ang mga programa ug proyekto sa probinsiya, tumong nga makunhuran pa ang kapobrehon sa Sarangani. (Edgardo E. Fuerzas)