GIPASALIG sa Davao City Police Office (DCPO) nga pasakaan gayud og kaso ang pulis nga nagpabuto sa iyang isyu nga armas atol sa selebrasyon sa bunyag alas 7:58 sa gabii, Hunyo 15, 2025, sa Purok 5-A, Barangay Los Amigos, Tugbok District, Davao City.
Sumala ni DCPO spokesperson Police Captain Hazel Tuazon nga kasohan gayud ang nasampit nga pulis nga Police Staff Sergeant nga nadestino sa Calinan Police Station 10.
“Gipailawom si Police Staff Sergeant sa paraffin, ballistic ug drug test examinations, ug ipasaka nato ang kaso niya nga Illegal Discharge of Firearm nga governed by Article 254 of the Revised Penal Code, as amended,” ingon ni Tuazon.
Sa report sa DCPO nasayran nga anaa ang nasampit nga pulis sa selebrasyon sa bunyag sa Purok 5-A, Barangay Los Amigos, Tugbok District, apan dihang nagtagay og ilimnong makahubog giingong dunay nakabikil ang nasampit nga Police Staff Sergeant apan dali ra sab nga naareglo.
Apan pipila ka minuto, giingong mikuha'g pusil ang nahisgutan ug nagpasalba kini nga gikalisang sa mga bisita hinungdan nga gi-report sa Tugbok Police Station ang maong hitabo.
Daling niresponde sa nahitaboan ang mga pulis sa panguna ni Police Major Michael Neffe ang Station Commander sa Tugbok PNP, kauban sila Police Lieutenant Vrenth Ira L. Valdeaco, Police Executive Master Sergeant Paulino Abastas ug pipila ka kaubanang pulis ug mga police auxiliaries hinungdan nga nadakpan ang nagpabuto nga pulis.
Narekober sa posisyon sa nahisgutan ang usa ka Glock 17 Gen. 4 pistol, uban ang Serial No. PNP 72411, ug usa ka magazine nga dunay karga nga napulo ka mga buhing bala.
Ang hitabo gikondena sa DCPO diin subay sa ilang opisyal nga pamahayag kagahapon pinaagi sa ilang Facebook page gipahibalo niini nga ang nasampit nga pulis gi-relib na sa katungdanan ug ang service firearm niini gikompiskar samtang nagpaabot sa resulta sa imbestigasyon.
Giingon ni DCPO Acting City Director, Police Colonel Hansel Marantan nga gikondena sa tibuok DCPO ang panghitabo, ug gipasalig nga dili kini palabyon ug kasohan gayud ang nasampit nga pulis.
“We are committed to the highest standards of discipline, professionalism, and accountability. The safety and trust of the public remain our top priority,” pamahayag ni Marantan.
Kasong Illegal Discharge of Firearm ubos sa I.S. No. X1-02-INQ-25-F-1996 ug administrative proceedings ang atubangon nga kaso sa nasampit nga pulis kinsa anaa karon temporaryong gibalhog sa selda sa Tugbok PNP kinsa gipailawom sa paraffin, ballistic ug drug test examinations sa Davao City Forensic Unit (DCFU) 11. (Jeepy P. Compio ug Hannah Martinez, AdDU Intern)