SA nahabiling duha ka semana sa di pa hingpit magbukas ang klase sa Hunyo 16, 2025, gitaho sa Department of Trade and Industry (DTI) ang namatikdan nga pagtiurok sa mga presyo sa piniling mga gamit sa eskuwelahan itandi sa niaging tuig.
Ang maong pagtiurok dako ang natampo sa pagkubos sa gasto sa produksiyon ug ubos nga presyo sa mga raw materials.
Sumala sa DTI, ang bag-ohay nga pagmonitor sa merkado nagbutyag nga mga mamaligyaay nagsunod sa suggested retail price (SRP) guide sa departamento.
Ang giya nagkober sa 195 stock keeping units (SKUs) sa tibuok 12 ka kategoriya sa produkto, nahitabo sa konsultasyon uban ang mga tiggama ug nakita sa makiangayon ug maayong presyo.
Gikanayon sa DTI nga mga 29 ka kasagaran nga palitunon nga gamit sa eskuwelahan—apil ang mga notebooks, pad papers, ug lapis—nakasinati og pagtiurok sa presyo nga tag P10 na lang. Giesplikar sa ahensiya nga ang maong pagpahaum nag-ugat gikan sa ubos nga operational nga galastuhan ug dugang maabot nga suplay, hinuon duna say pipila ka gamit namatikdan ang dyutay nga pagtaas sa presyo.
Sa gilusad nga pagpaniid sa mga school supply sa mga merkado sa Divisoria ug nagkadaiyang malls, nasusi sa mga opisyal sa DTI nga mga namaligya kadaghanan nagtuman sa pricing standards. Ang maong pagsusi nagtumong aron nga maseguro nga maabot ang mga presyo sa mga pamilya nga nangandam na alang sa bag-ong pagbukas sa klase karong tuiga.
Samtang gipasalig ni Trade Secretary Cristina Roque ngadto sa publiko nga mga presyo sa batakang palaliton nagpabilin nga lig-on, ilabi kadtong kasagaran nga malakip sa packed lunch sa mga tinun-an apil na ang mga meryenda.
Gipahimug-atan niini nga way pagtaas sa presyo sa batakang palaliton (basic necessities ug prime commodities", nagpalig-on sa paningkamot sa gobyerno nga mamentinar ang kaayohan sa konsumante taliwala sa presyur sa ekonomiya.
Samtang naghigpit sa pagpangandam alang sa tuig tigtungha, gidasig sa DTI ang mga ginikanan ug tinun-an nga moduso sa opisyal nga listahan sa SRP aron nga pabiling mahibalo sa pilion ug malikayan ang "overpriced goods."
Ang listahan makita sa listahan sa opisyal website sa DTI ug social media platforms. (David Ezra Francisquete)