Seguridad sa Cotabato gihugtan

Seguridad sa Cotabato gihugtan
Hulagway ni Mayor Bruce Matabalao.

COTABATO CITY — Gihisgutan sa security stakeholders meeting kon unsaon pagtutok ug pagpugong nga masubli ang sunod-sunod nga pagpamusil sa dakbayan nga sagad dili mahatagan og hustisya.

Usa sa mga nag-unang rason sumala pa ni City Police Director Col. Querubin Manalang Jr. mao ang kakuwang sa closed circuit television (CCTV) camera ug kung naa man, walay gustong makig-istorya sa kahadlok nga malambigit.

Niining milabay nga bulan sa kasamtangang tuig, tulo ka mga tawo ang gipamusil-patay sa siyudad.

Bisan og mikunhod og 50 porsiyento ang kaso sa pagpamusil kon itandi sa susamang panahon sa niaging tuig diin adunay unom ka kaso, mas nakapabalaka karon tungod kay kadaghanan sa mga biktima mga opisyal sa gobyerno.

Tungod niini, gusto sa Cotabato City Government nga ipatuman ang Barangay Intel Network, ibalik ang relasyon sa barangay ug pakigtambayayong sa komunidad tungod kay matud pa ni Cotabato City Mayor Bruce Matabalao, importante ang papel sa mga opisyal sa barangay ug mga sibilyan alang sa pagpatunhay sa kalinaw sa dakbayan.

Gitinguha usab sa City Government nga i-link ang mga piniling CCTV camera nga gipanag-iya sa mga pribadong establisemento ngadto sa command center sa dakbayan.

Kini aron maseguro nga walay kaikyasan ug madakpan dayon ang bisan kinsa nga makahimo og krimen  sa siyudad.

Magtukod usab ang City PNP og dugang mga outpost ug magpakatag og dugang uniformed ug non-uniformed personnel sa tanang strategic area sa dakbayan, ilabi na sa Governor Gutierrez Avenue (ORC).

Idili na sab ang pagparada daplin sa ORC ingon man ang mga tindera sa palibot aron dali nga makaresponde ang mga awtoridad kon adunay krimen kay moluag na ang lugar.

Hatagan usab og ganti sa City Government ang tanang gustong motestigo sa bisan unsang krimen ug nisaad ang PNP nga luwas ang bisan kinsa nga moduol kanila aron mahimong testigo.

Nagplano usab ang City Government nga mopalit og high-tech nga teknolohiya sama sa CCTV ug uban pa.

Gimandoan ang mga barangay sa pagpahigayon og temporary lockdown sa matag higayon nga adunay mga hitabo sa pagpamusil aron ma-corner dayon ang suspek.

Samtang si bisan kinsa sab nga barangay kapitan sa dakbayan nga mapakyas sa pagkooperar sa mga awtoridad sa pagwagtang sa ilegal nga druga sa ilang komunidad pasakaan og kasong "Dereliction of Duty" ug kalapasan sa Republic Act 9165.

Ang tigum gitambongan sa nagkadaiyang law enforcement units nga naglakip sa Philippine Drug Enforcement Agency (PDEA), National Bureau of Investigation (NBI), Philippine Army, Marines ug kapulisan, religious sectors, academia, City Prosecutors Office ug uban pa nga line agencies.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph