Selos nisampot sa dinunggabay

PULOS mitugpa sa balay-tambalan ang tulo ka mga indibiduwal, usa niini babaye, human sa natigayong lalis gumikan sa selos nga miresulta sa pagpangdunggab.

Sa record sa San Pedro Police Station, ang insidente nahitabo alas 5:15 sa hapon, Agosto 18, 2024, sa Duha, San Rafael, Barangay 10-A, Davao City.

Nasayran nga samtang naghugyaw ang sagad sa mga Dabawenyos sa Kadayawan Festival, apan sa Brgy. 10-A miresulta sa duguon nga panagtagbo sa tulo ka indibiduwal sa usa ka boarding house sa dapit.

Usa sa biktima mao si alyas Darwin, 26-anyos, construction worker, taga Manuel Peralta, Malita, Davao Occidental; ikaduhang biktima mao si alyas Juvy, 28, babaye, taga Lagumit, Malita, Davao Occidental nga nag-abang og boarding house sa Duha, San Rafael, Brgy 10-A, Davao City.

Saysay sa testigo, nga kalit lang miabot ang suspek nga si alyas Jonathan, 29, dish washer, nangabang sa may Purok 11, Lower Madapo, Barangay 8-A, Davao City.

Si Jonathan giingong misaka sa boarding house sa biktima, miadto sa lawak ug mi-aksiyon og dunggab ni alyas Darwin.

Si alyas Juvy nga anaa atol sa hitabo, daling nakapugong sa suspek rason nga nasamad siya sa kamot.

Dinhi mimustra si alyas Darwin, misukol sa suspek nga naigo sa dughan, samtang siya nasamdan sab.

Ang tulo pulos gidala sa Southern Philippines Medical Center (SPMC), diin ang suspek anaa na sa luwas nga kondisyon.

Dugang sa kapulisan nga way kasong ipasaka ang mga biktima tungod nagkasinabot nga han-ayon na lamang nila kini nga hitabo didto sa barangay. (RGV, JPC)