NAGBAHAD ang mga suporter nga Dabawenyos ni kanhi Presidente Rodrigo Roa Duterte (FPRRD) nga padayon silang molusad og senimanang protesta isip suporta sa kanhi presidente, human sa opisyal nga paglusad sa Green Rise Action Movement sa Rizal Park, San Pedro Street, Davao City, Dominggo, Abril 6, 2025.
Nanguna sa paglusad, serye sa mga kalihukan, naglakip sa selebrasyon sa Araw ng Davao ug Rody @ 80: Filipino Global Solidarity Rally, niabag sa pagmugna sa buylo alang sa kalihukan.
Nisaad sa padayong suporta ug kahiusahan, ang grupo nagplano nga molusad og matag Dominggo nga panagtigum aron ipakita ang padayong panaghiusa alang kang FPRRD.
Mga rali, gipasiugdahan sa Green Rise Movement ug sa LGBT Davao City Coalition (LGBT DCC), nagsugod 5:45 sa hapon ug natapos sa 7:30 sa gabii. Dunay gibana-bana nga mitambong nga moabot og 1,000 — 600 gikan sa Green Rise Action rally ug 400 gikan sa LGBT DCC rally. Ang duha ka kalihukan pulos nagmalinawon ug walay mga nahitabong dautang insidente, sumala sa mga awtoridad.
Mga mitambong naglakip kang Davao City Mayor Sebastian "Baste" Duterte, Deputy Mayor Randy Usman, kandidato sa pagka-senador Dr. Richard Mata, Sagip Partylist Representative Dante Marcoleta, Atty. Jimmy Bondoc, kanhi Mindanao Development Authority (MinDA) Chairman Sunga Acosta, Atty. Israelito Torreon, ug kanhi Budget secretary lawyer Wendel Avisado.
Atol sa rali, naghisgut si Atty. Avisado bahin sa tumong sa kalihukan nga magtigum matag Dominggo aron suportahan si FPRRD ug magpataas sa kaamgohan bahin sa ilang nakita nga mga inhustisya batok kaniya.
“This is also our way of telling the government how sad and angry we are over the ongoing injustice being done to our former president,” matud ni Avisado.
Giawhag sab ni Mayor Duterte ang katawhan nga magpabilin nga lig-on ug resilyente taliwala sa mga hagit nga legal sa kanhi presidente.
“Kitang mga Dabawenyo, dapat magpabilin tang lig-on. Dili ta papildi sa ilaha. Diri nato makit-an atong kalig-on. Dawaton nato nga gikuha siya, iyaha man na. Pero kita, magpabilin gayud kitang lig-on,” awhag sa mayor. (Jhayrene Hermoso DOrSU Intern)