GIBUTYAG ni Presidente Ferdinand "Bongbong" Marcos Jr. nga buot nilang pakusgan ang mga serbisyo ngadto sa tanang mga benepisyaryo sa Pantawid Pamilyang Pilipino Program (4Ps) isip dalan alang kanila nga mohimo og lakang padulong sa pagpalambo sa ilang panginabuhi.
Matud ni Marcos atol sa Trabaho sa Bagong Pilipinas niadtong Sabado, Pebrero 15, 2025, sa Tagum City Hall, nga naglusad sab sila og "cross-matching". Pinaagi niini, makaseguro sila nga ang abilidad sa mga benepisyaryo mohaum sa mga trabaho nga ilang aplayan.
“Ito ay paghahanap ng trabaho na akma sa inyong kasanayan upang matiyak na ang inyong hanapbuhay ay tumutugma sa inyong kaalaman. Sa ganitong paraan, masisiguro natin na ang inyong talento, galing, at husay ay nabibigyan ng halaga,” tug-an niya.
Gipamahayag ni Margie Cabido-Sobretodo, 4Ps DSWD-Davao division chief, nga sukad ala 1 sa hapon, mga napulo ka indibiduwal nakatrabaho gilayon (on the spot). Sa maong ihap, walo niini gikan sa Carmen, ug ang nahabiling duha gikan sa Tagum City. Gilauman niya nga ang makuha o ma-hire modaghan pa.
"Ang pinaka-objective talaga ng activity na ito ay is to promote the employability and mas ma cater natin yung mga beneficiaries ng 4Ps because most of them are graduating na," pasabot niya.
Iyang gi-esplikar nga sa buntag, natagad nila ang mga 1,000 nga mograduwar nga 4Ps beneficiaries gikan sa munisipalidad sa Carmen, ug sa hapon, naabagan nila ang mga 2,000 ka benepisyaryo gikan sa Tagum City. Dugang pa niya nga ang tumong sa programa mao ang alang sa mograduwar nga mga benepisyaryo nga mahimong "self-sufficient". Giklaro niya nga sa Davao Region lang, mga 75,000 ka benepisyaryo gitakdang mograduwar karong tuiga.
Ilawom sa Section 34 sa Republic Act 11310, o ang Pantawid Pamilyang Pilipino Program (4Ps) Act, gimando niini nga ang qualified household beneficiaries magpabilin sa programa alang sa maximum nga pito ka tuig.
Dugang pa nsa job fair, naghanyag sab ang Department of Agriculture (DA) sa oKadiwa ng Pangulo, samtang ang Department of Labor and Employment (DOLE), gawas sa paghatag og trabaho, naghanyag sab og Tulong Panghanapbuhay sa Ating Disadvantaged/Displaced Workers (Tupad) ngadto sa mga 1,000 ka benepisyaryo.
Gikanayon ni Sobretodo nga kung ang resulta sa fair sa Tagum magmatuod nga malampuson, ila kining sundogon nga inisyatibo sa ubang mga probinsiya sulod sa rehiyon. Sulti sab ni DSWD-Davao Regional Director Merlinda A. Paragamac nga magpadayon sila sa pagmonitor sa mga benepisyaryo kinsa nakagraduwar na, uban ang ilang mga personahe nga magmonitor sa katikran sa ilang mga kinabuhi.
"Hindi mag-alala ang nasa neighboring municipalities kasi this is just a start we have to continue this effort para matulungan talaga natin ang ating mga 4Ps families. Don't worry for the other," dugang pa niya.
Si Michel Natad, 33-anyos nga 4Ps beneficiary gikan sa munisipalidad sa Magsaysay ug usa niadtong na-hired on the spot, nagsulti sa paghinabi ngadto sa mga tigbalita nga siya mi-aplay sa usa sa mga malls sa Panabo City. Tug-an niya nga kini na ang iyang ikaduhang pagsulay, ug hingpit na gyud nga nakuha sa trabaho.
“Seguro kung dili tungod sa 4Ps dili ko makasulod ani nga trabaho,” pagkanayon niya.
Si Natad, inahan sa duha ka anak, mograduwar gikan sa programa karong tuiga, nakabenepisyo niini sulod sa pito ka tuig. Nagpasalamat siya sa tabang nga gihatag kaniya ug karon nga siya mograduwar na, maningkamot siya sa iyang mahimo aron nga mapalambo pa niya ang ilang kinabuhi.
Kini na ang ikatulong job fair, kon diin ang una gilusad sa National Capital Region (NCR) ug ang ikaduhang sa Iloilo City niadtong Pebrero 13, 2025. (Rojean Grace G. Patumbon)