'Shabu lab' sa Maitum giukay

PADAYON ang imbestigasyon sa mga awtoridad sa nadiskobre nga shabu laboratory sa Sitio Sagel, Barangay Pinol, Maitum, Sarangani Province.

Sumala pa nga daghang kagamitan sa paggama og ilegal nga druga ang naukay sa mga awtoridad sa usa ka bodega sa maong lugar alas 8:30 sa buntag, Dominggo, Agosto 4, 2024.

Matud ni Police Major Ramil B. Aruelo, hepe sa Maitum Municipal Police Station nga gironda sa kapulisan ang usa ka bodega pinaagi sa gahum sa search warrant sa pakig-alayon usab sa mga sakop sa 38th Infantry Battalion sa Philippine Army nga gipangulohan ni Police Colonel Deanry R. Francisco, director sa Sarangani Police Provincial Office (SPPO).

Sumala pa nga sa pagsulod pa lang sa mga operatiba sa maong bodega, nasuta nila ang mga dagkong makina nga gidudahang gigamit sa paggama og ilegal nga druga.

Mga makina gihulagway nga puwedeng makaprodyus og daghang suplay sa mga shabu.

Nasayran nga ang maong bodega naa lang nahimutang sulod sa kampo nga giangkon sa Moro National Liberation Front (MNLF).

Dugang sa taho nga usa ka Chinese national matud pa kinsa giilang si "Tommy Go", giingong kasamtangan nga nagpuyo sa General Santos City, nakit-an nga nibisita sa nasangpit nga bodega.

Sa pagkakaron, padayon ang hugot nga imbestigasyon sa mga awtoridad aron masikop ang tanang nalambigit sa pagtukod sa maong shabu laboratory.

Gipasalig ni Aruelo nga dili mohunong ang Maitum MPS sa pagpahigayon og surveillance ug pagdakop sa mga tawo nga nalambigit sa ilegal nga negusyo sa lungsod.

Samtang giawhag sa opisyal ang mga molupyo sa Maitum nga mosalig lang sa kapulisan ug kung dunay mahibaw-an nga tawo nga nalambigit sa ilegal nga kalihukan, itaho gilayon ngadto sa ilang buhatan. (EEF)