PADAYON gihapon nga dunay mga dagkong kantidad sa gituohang shabu ang makumpiska sa Davao City bisan pa sa hugot nga monitoring sa kapulisan.
Alas 8 sa buntag niadtong Martes, Mayo 21, 2024 nasakmit sa mga sakop sa Baliok Police Station ang nagkantidad og P294,848.00 nga shabu atol sa buy-bust sa Pepsi Cola Village, Barangay Dumoy, Talomo District, Davao City.
Giila ang suspek nga si alyas Niño, 35-anyos, ug residente sa maong lugar.
Ang suspek napalitan og usa ka pakite ug nakuhaan sa laing walo pa ka mga pakite sa gituohang shabu.
Nakuhaan sab ang suspek og usa ka .45 caliber Colt pistol nga dunay usa ka magazine ug pito ka mga bala.
Kasong paglapas sa Republic Act (RA) 9165 kun Comprehensive Dangerous Drugs Act of 2002 ug RA 10591 Illegal Possession of Firearms ang Ammunitions ang atubangon sa suspek didto sa korte. (JPC)