'Shear line' nagdala og baha sa Davao

'Shear line' nagdala og baha sa Davao
(Hulagway gikan sa City Government of Tagum)

DILI low pressure area (LPA) ang daut nga panahon nga nasinati sa dakong bahin sa Mindanao, apan ang gitawag nga weather condition nga "shear line," sumala sa Philippine Atmospheric, Geophysical and Astronomical Services Administration (Pagasa).

Ang "shear line", suma sa AMS Glossary of Meteorology, usa ka linya sa lugar diin adunay kalit nga pagbag-o sa direksiyon sa hangin.

Gumikan sa pagbangga sa hangin kun gitawag nga "convergence" adunay mas kanunay nga mga thunderstorm o mga pag-ulan nga mo-ubay sa "shear line," diin sa karon mao ang hanging Amihan.

Tungod niini, daghang lugar sa Davao Region ang gipangbaha hatud sa sagunsong ulan nga nasinati gikan pa Lunes sa gabii, Enero 15, 2024.

Sa talaan sa awtoridad gikan alas 12 sa udto, Enero 16, 2024, aduna na’y 283 ka mga pamilya ang namakwit gumikan sa taas nga tubig baha.

Sa Tagum City, daghang mga residente sa Apokon ang gipang-rescue sa mga personahe sa City Disaster Risk Reduction and Management Office.

Sa Davao City, gipang-atiman ug gipakaon sa City Social Welfare and Development Office-Davao (CSWDO), kauban ang barangay council sa Bunawan Proper ang mga residente nga mibakwit.

Ang mga mibakwit nga residente kasamtangang anaa sa Barangay Bunawan Proper Gym nga gipanghatagan og mga hot meals.

Anaa nasab sa lugar ang Davao City Health Office (CHO) aron mo-atiman sa medical nga kinahanglan sa mga residente ug magbutang sab ang CSWDO og child-friendly space sa evacuation site.

Nagpahimangno sab ang Davao City Disaster Risk Reduction and Management Office nga gilayong mohimo'g pre-emptive evacuation ang mga anaa nagpuyo sa ubos nga bahin duol sa sapa, ug kanunayon ang pag-monitor sa landslide ug flood-prone areas.

Sa pagsuwat ning balita, padayon pa ang pagsaka sa ihap sa mga pamilya nga naapektuhan sa mga pagbaha.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph