BISAN pa sa padayong hagit sa legalidad gikan sa makakalikupang mga grupo, gikompirma sa Department of Public Works and Highways sa Davao Region (DPWH-Davao) nga ang konstraksiyon sa P23-bilyones nga Samal Island-Davao City Connector (SIDC) bridge project magpadayon subay sa plano niini.
Gibutyag ni DPWH-Davao spokesperson Dean Ortiz, sa eksklusibong paghinabi niadtong Miyerkules, Mayo 21, 2025 nga ang proyekto padayong niaginod subay sa target niini nga mahuman sa 2027.
Bisan tuod kung iyang giila ang padayon nga mga kaso nga dunay kalambigitan sa mga isyu sa "right-of-way" sa Davao City apan gipahimug-atan niini nga wala kini makaapekto og dako sa kinatibuk-ang dagan sa panahon sa kontraksiyon.
Ang SIDC project mao ang 3.9-kilometros, upat ka linya nga cable-stayed bridge nga nagdugtong sa Barangay Limao sa Island Garden City of Samal ngadto sa R. Castillo-Daang Maharlika junction sa Davao City, molatas sa Pakiputan Strait.
Ang tulay dunay vertical navigational clearance nga 47 metros ug gilauman nga makaakomodar og hangtud 25,000 ka mga behikulo matag adlaw, nga dako og higayon nga makapakubos sa oras sa biyahe padulong Samal ug Davao City gikan 30 minutos nga magbarko ngadto sa singko minutos na lang.
Ang proyekto maoy punting karon sa giduso sa environmental groups nga 200-pahina nga petisyon sa Korte Suprema niadtong Abril.
Mga nagpetisyon nagtinguha og "writ of kalikasan" ug "temporary environmental protection order," nagtumbok sa mga kabalaka bahin sa potensiyal nga "irreparable damage" sa coral reefs sa Paradise Reef ug sa Hizon Marine Protected Area.
Ilang gipangatarungan nga ang proyekto naghulga sa marine ecosystems ug mga panginabuhian sa lokal nga komunidad nga nagsalig niini.
“This case reveals both a slow and an immediate death of the coral reefs in the Davao Gulf,” matud sa petisyon. “The destruction of the coral reefs poses an actual threat to the thriving local communities. If the coral reefs that have been relied upon for centuries would die, it is a tragedy—where the powerful, the State itself, plays god,” dugang niini.
Mga nagpetisyon naglakip ni Ecoteneo Director Carmela Marie Santos, Interfacing Development Interventions for Sustainability Executive Director Mark Peñalver, Dyesabel Philippines chairperson Marvelous Camilo, ug Sustainable Davao Movement.
Nanawagan sila sa dinalian nga "cessation of the project" ug alang sa mga respondente nga makasumite sa ilang tubag sulod sa napulo ka adlaw gikan sa pagdawat sa petisyon. Naghangyo sab sila sa korte nga momando sa "rehabilitation and preservation" alang sa naapektuhan nga marine ecosystems.
Mga respondente sa kaso mao ang Department of Public Works and Highways, Department of Environment and Natural Resources, Samal Island Protected Landscape and Seascape Protected Area Management Board, ug ang China Road and Bridge Corporation, nga maoy nagdumala sa konstraksiyon.
Kasamtangan, gitaho ni DPWH-11 Regional Director Juby Cordon nga ang proyekto nakakab-ot na og 3.487 porsiyento nga kinatibuk-ang " physical accomplishment."
Ang design phase nakompleto na, samtang ang pagkuha sa right-of-way nagpadayon.
Sa 55 ka naapektuhan nga luna sa Davao City, 14 niini nakuha pinaagi sa "negotiated sale", samtang ang laing upat nakuha pinaagi sa "expropriation". Sa Samal Island, tanang apektado nga propedad nahuptan na.
Gitin-aw ni Cordon nga ang 78 porsiyento sa mga naapektuhan nga kalubinhan sa Davao City ug 100 porsiyento sa Samal "cleared" na.
Samtang ang kaso naa pa nakaung-ong sa Korte Suprema, gipasalig sa DPWH-Davao nga andam silang motuman sa bisan unsang "legal orders" nga motumaw gikan sa "proceedings" apan subling nagpadayag sa ilang komitment sa pagtapos sa imprastraktura subay sa gitakda. (David Ezra Francisquete)